Japan-i jembiba ama mapa agi sayutsüla: Park Geun-Hye

Seoul, August 15 (Agencies): Japan-i jembizüka yokba ama mapa agi inyaka sayutsü olen ka South Korea Tir, Park Geun-Hye-i tanü Honibar nü metetdaktsüogo.
“Tesüiba mapang atalokba otsü kecha agi memimbangtettsü,” ta shia, Japan Ato Kilonser, Shinzo Abe-i yashi sasa bilemba olen sangoktsüba agi par S Korea temulung mesüdaktsüba olen ka Park-i tanü metetdaktsü.
Japan mitkartemi tebang agi mejembitettsüsa ozüng alema inyakba atema sasa bilemba olen ka Abe-i yashi Hokolbar nü sangoktsü saka par mitkartemi tesüiba mapang aibelenba atema taidok meshiba olenbo memetetdaktsü.
Japan mitkartemi WWII mapang Korean Peninsula tashiyim agi agia S Korea tsür nem tashiyim agi pei teküp yokdaktsüba atema Abe-i taidok memeshiba atema mepelaba olen ka Park-i tanü agiba Japan-i WWII tongpang nung tamakok ajurur küm 70 abensaba bilemteta amongba sentong nung metetdaktsü.
“Japan-i tesüiba mapang tashiyim inyakba atema Abe-i taidok meshiba olenji kanga pela agizüker saka Japan-i jembizüka yokba ama mapa agi inyaka sayutsü nungdaker,” ta Park-i tanü metetdaktsü.
Ano külen, Japan’er cabinet minister 2 tashi tashishitsü ken o adokba Yasukuni shrine tanü semdangba osang jangjaogo.
Tongpang raradang ozüng alema inyaker densema tongpang balala nung asüba Japan mitkar züngsem million jenti nem tetushi agütsütsü nüngtem nung iba Yasukuni shrine yangluba osang bushiteta lir.
Aji oda, par lenisangi külen sasa bilemba olen lemsatepdang, par yimsüsürtemi Yasukuni shrine semdangba ajanga par o aser mapa na meputepi akümer lir.
“Japan mitkartemi tashiyim agi pei teküp yokdaktsüba S Korea tsür meyirijang jenti rong nungi parnok 50 shi tanga taküm lir,” ta shia, Japan-i iba ken o ya tekaraba mapang nung bentettsüla ta Park-i tanü sangoktsü.
Japan-i mapa agi sasa bilembaren inyaka sayuba ajanga dang kidangsüa aliba linüktem aser alima ajungai par lenirtem dak temulung lemteta akümtsü ta lai shisem.