Japan-i Myanmar nem teyari sen bn 7.73 agütsütsü: Abe

Tokyo, November 02 (Agencies): Japan sorkari Myanmar linük nem teyari sen, dollar sen billion 7.73 tashi taruba küm 5 tsüngda nung agütsütsü renemba olen ka Japan Ato Kilonser, Shinzo Abe-i tanü, Bobdar nü metetdaktsüogo.
Myanmar nung yimji yimjung lidaktsütsü aser nungdakba terenlok mapatong balala inyaktsü nung yariteptsü nükjidong nung par linüki tan teyari senji agütsütsü renema lir.
South East Asia nung tentetba Myanmar linük nung alir nütsüng yongsük ajema alir nüburtem yaritsü asoshi sorkar aser private sector naprongi tenzüka aliba mapatong nung yariteptsü atem tan teyari sen, yuan sen billion 40 shi amshitsü sentong lir.
“Tan teyari sen agütsüba ajanga Myanmar kübok region balala nung yimji yimjung sentong takok ngua agitsü imlar,” ta Abe-i par linük semdangla, Myanmar lenila, Aung San Suu Kyi den Tokyo yimtiba nung osangbener den aroki ajurutepdang metetdaktsü.
Tanüngba teyari senji airports aser electricity densema, nübur taküm jenjang tajungba kümdaktsütü mapatong balala nung amshidaktsütsü sentong aliba osang angazükogo.
Japan nungi rongsenren teyari angutsü nükjidong nung Suu Kyi-i tan anogo 5 agia Japan semdangtsü tenzüka lir.
Par Myanmar linük kübok Rakhine state nung nütsüng yongsük ajema alir Muslim nüburtemi rishikangshi tia kanga sashia ajuruba aser iba ken o nung ajemdaker, US-i par Myanmar sorkar aitsütsü tenzükba mapang ka nung Suu Kyi-i tan Japan semdanger lir.
Rakhine state nung tensa azüoktsü atema Myanmar-i par mitkartem mepetmesü adokba Rakhine state-i yoka lir saka mitkartemi idakji ozüng alema mapa inyakba osang bushitetogo.
China den tokteptsü atema Myanmar linüki Japan den tesendaktep tajung ayutsü aser rongsenren teyari agitsü nungdaka lir aser Japan linükia Myanmar nung nungdakba kiojen renema par linük terenelok lidaktsütsü tejangraba aliba osang bushiteta lir.