Japan-i Nobel senpet angur Kazuo Ishiguro tushir

Tokyo, October 06 (Agencies) : Hokolbarnü Japan sorkari Japan nung asoba Britain nunger kaketzülur, Kazuo Ishiguro nem pai ‘Nobel Prize for Literature’ anguba atema tenüngsang aser tetushi agütsü.
Ishiguro-i takok anguba ya Brihostibanrü metetdaktsü, aser iba osang ya Japan osangkakettem nung kanga ayimsünga prokshiogo aser Ato Kilonser Shinzo Abe-ia iba takok angur nem tenüngsang agütsüogo, ta osang ajanga ashi.
Japan ya Kazuo Ishiguro indang fans jenti aliba linük ka lir. Parnok den külemi nia Wb. Ishiguro nem iba takok tulu asoshi tenüngsang agütsür,” ta Abe-i ashi.
1954 küm Nagasaki nung asosang kaket zülusang ya arishi küm 5 asüba mapang aser pa UK-i mao kaket ti tashi zülur liasü.
Tan Ishiguro-i iba akümket senpet ya “novels of great emotional force” aser “uncovered the abyss beneath our illusory sense of connection with the world” kakettem ajanga anguba lir.
Pai züluba nüngtugu kakettemji “An Artist of the Floating World” (1986), “The Remains of the Day” (1989), koba ajanga Booker Prize angu aser iba otsü nung ajemdaker movie-a ka yanglua lir, aser “Never Let Me Go” (2005) kakettem lir.