Japan-i North Korea anema tenokdangba sentong benoker

Tokyo, February 10 (Agencies): North Korea-i tawa anünglaki satellite ka kaketa yokba sülen Japan linüki N Korea anema tenokdangba sentong benokba osang ka tanü, Bodbar nü alima dang sangoktsüogo.

N Korea-i satellite kaketa yokba dak atemer par tongpang nung amshitsü ballistic missile technology rendaktsütsü mapatong inyaker ta par linük dak temulung melemi bilema, Japan-i tan tenokdangba sentongji benoker lir.

Tokyo den külemi, Washington, South Korea, US aser par linük pusemertemi Pyongyang dak temulung melemi aliba osang bushiteta lir.

Japan-i Pyongyang anema tenokdangba sentong benokba den külemi, S Korea-ia Pyongyang den aroki lungjema ketdang asüba factor park nung mapa inyakbaren anena Pyongyang’er tongti senotsü angutsü lenmang shibangtsütsü lemtetba osang ka tanü metetdaktsüogo.

“Nübur yaritsü sen dollar sen 869.94 ser tajemba agütsüba dak alaka, N Korea nem agütsüba teyari sen ajunga magütsüi nokdangtsü lemtetogo,” ta Japan Chief Cabinet Secretary, Yoshihide Suga-i tanü sangoktsü.

Japan-i teyari sen agütsütsü maparen anentsü lemtetba den külemi, nüurtemi N Korea semdangtsüren nokdangtsü aser N Korea’er rongtem par rong anenzükdak manenzükdaktsütsü renema lir.

“Alima ashi mangai, Pyongyang-i par 4 buba nuclear oset tendanga kadokba sülena maneni par ballistic missile tendanga kadokogo. Yamaji inyakba ajanga ozü linük nem lendong bener arutsütsüsa tensa bener arutsüba den külemi, Northeast Asia aser alima ajunga nung tensa mejungi kümdaktsütsüsa tia bener arutsüogo aser iba maparenji ozü Japan linüki khen yongi magizüker,” ta Suga-i metetdaktsü.