Japan-i WWII tongpang nung aibelenba atema sasa bilemer: Abe

Japan Ato Kilonser, Shinzo Abe (Achijilen) aser kinüngtsü, Akie nati Japan anülulentip tsütsü Nagato nung osangbener den ajurutepba noksa nung angur. (Nagato, August 14)

Tokyo, August 14 (Agencies): Japan Ato Kilonser, Shinzo Abe-i tesüiba mapang World War II tongpang raradang par mitkartemi ozüng alema inyaka aibelenba atema sasa bilemba olen ka tanü Hokolbar nü metetdaktsüogo.

“Japan mitkartemi WWII tongpang nung tai maketba nüburtem nem tebang agi meshitetba teraksa aser timtem toushi tia bener arutsüba arutsü atema sasa bilemer,” ta pai tanü metetdaktsü.

“Tarutsü putu nung soa intetba Japan sensotemi WWII mapang aibelenba atema taidok meshitsü menungdaktsü,” ta pai ashi saka par mitkartemi WWII tongpang raradang aibelenba atema taidok meshiba olenbo Abe-i tanü memetetdaktsü.

Japan-i WWII tongpang nung tamakok ajurur küm 70 abensaba bilemteta amongtsü anogo ka jilia, tanü o jembidang Abe-i iba olenji metetdaktsü.

Paisa ashiba agi, taoba mapang nung Japan-i WWII mapang aibelenba atema taidok meshia lir.

“WWII tongpang tembanger küm 70 abensaba bilemteta ni Japan aser bendanglen tongpang balala nung asür ajunga nem akümtsübo agütsür,” ta pai ashi.

Ano külen, South Korea aser China na densema Japan den kidangsüa aliba linüktemi Abe-i tanü sangoktsüba olenji agizüktsü asü magizüktsü iba osang tang tashi jangjateta mali.

Japan’er Imperial Army-i WWII raradang kidangsüa aliba linüktem tashiyim agi agiba den külemi, tetsürtem densema tai maketba nüburtem kanga reshikangshia ozüng alema inyak aser iba yongji, WWII tembanger küm 70 abensaba mapang tashi nung Japan aser kidangsüa East Asia nung tentetba linüktem na tsüngda tangasa tesendaktep junga meyangluteti lir.

“Ozü Japan mitkartemi WWII mapang kidangsüa aliba Indonesia, Philippines, Taiwan, Republic of Korea aser China nunger jashidaktsüba atema sasa bilemer aser Japan-i tesüiba mapang aibelena inyak ta nangzüker,” ta Abe-i tanü metetdaktsü.