Japan linüki Netaji indang tongtibang file 2 sangdongtsü

New Delhi, April 26 (Agencies): Taküm küm tatemlen tashi nung Japan linüki Netaji Subhash Chandra Bose dak sentakba tongtibang file ana sangdongtsü, ajisüaka parnoki Netaji indang file asem atemabo telangzüba magütsü, ta Mongolbarnü sorkar osang ka ajanga metetdaktsü.

Lok Sabha senden nung Minister of state for home, Kiren Rijiju-i, Netaji indang file pongu Japan ket nung lir, aser itemji Netaji samaba osang jungkai adoktsütsüsa tongtibang asütsüa akok, ta metetdaktsü.

Lok Sabha Question Hour mapang Rijiju-i, “Japan linüki onok dang parnoki taküm küm tatemlen tashi nungbo file ana sangdongtsü ta shiogo, ajisüaka tanüngba file asem atemajibo kecha mashi. Ajisüaka tanüngba file asemjia parnoki sangdongtsü ta onoki imlar,” ta metetdaktsü.

Rijiju-i ashiba agi, Netaji dak sentakba file ana koba Prime Minister’s Office aser ministry of home affairs ket nung liasü, ibaji tang tashi menguteter.

Rijiju-i, India-i linük aika dang Netaji dak sentakba file agütsütsü mepishiogo aser iba atemaji parnoki telangzüba agütsüogo, ta ashi.

Austria, Russia aser United States linüktemibo India sorkar dang parnok ket nung Netaji dak sentakba file mesüra kaket mali ta shiogo, ajisüaka United Kingdom-ibo parnok ket nung aliba file 62 prong British Library nem agütsüogo, ta ashi.

Germany linükia, Netaji dak sentakba file temji sangdongba sülen yuogo, ta ashi.

Rijiju-isa, mezüng bushisüngdangba Commission anatibo Netaji Bose ji August 18, 1945, nü Taihoku (tangbo Taipei) nung tayimtsü tsüokokba lendong nung asü ta shiogo, ajisüaka Mukherjee commission-ibo ibaji magizüker, ta metetdaktsü.

“Netaji dak kechi atalok’ar ibaji onoki shitettsüsa jenjang ka nung mali,” ta paisa shisem.

Tang tashi nung sorkari Netaji indang file 150 shi sangdongogo aser itemji online nung angutsü, iba den külemi ita shia file 25 dak tali online nung upload asür, ta minister-i ashi.