Japan: Menoknok lendong nung 9 asü, 1000 shi yiru

Japan southwest tsütsülen menoknok lendong atalokba sülen firefighter ketdangsertemi Mashiki jila nung densemba ki jirepdak nungi ita 8 tain kinü tetsür ka kümzüka anitetdang agiba noksa yangi angur. (Mashiki, April 15)

Tokyo, April 15 (Agencies): Japan southwest tsütsülen densemba tesemtem nung yasüng, Brehostibar aonung atalokba menoknok lendong nung nisung 9 asüba aser nisung 1,000 shi yiruba osang tang tashi nung jangjaogo.
Yasüng magnitude 6.4 menoknok tesashi Kumamoto yimti aser temeket tesemtem nung anokba sülen tanü, Hokolbar nikongtsütsü tashi nung ali 130 ben shi maneni anokba osang ketdangsertemi metetdaktsü.
Honda Motor Corp (7267.T) densema, tan menoknok anokba ajanga gari aser electronics osettsüset yangludak jenti shibangtsüsa akümba osanga parnoki metetdakja liasü.
Yasüng, 9:30 ako meta menoknok anoktsü tenzükba sülen nisung 44,000 dak temai kaket reju aser iba amala lokti tentet sentepdak jenoka pei taküm kümzüktsü merangba osanga jangjaogo.
Tan menoknok anokba ajanga lenmang ana küma paksaba, ki jirepba aser Kumamoto tiyongtsülen tentetba küm 400 tejen Kumamoto Castle kilem jirepba osang angazükogo.
Firefighter ketdangsertemi ki jirepdak nungi kümzüka aniteter rong nung ita 8 tain kinü tetsür ka densemba osanga jangjaogo.
“Nungdak dang adokra teyarir tali yoksemtsü renema lir,” ta Japan Ato Kilonser, Shinzo Abe-i sangokja, lendong atalokdaki mitkar, police aser firefighter ketdangser 3,000 dak tema yoka nüburtem yaridakja liasü.
“Tan lendong ajurushir ajunga kümzüka anitettsü asoshi akok tashi inyaktsü nangzüker,” ta Abe-i nangzükba osanga jangjaogo.
Tan lendong nung asür timba menoknok anokdak tiyongtsü, nütsüng yongsük nisung 34,000 shi alidak, Mashiki jila nung alir aliba osanga angazüka lir.
Ano külen, tan menoknok anokba sülen Japan anülulentip tsütsülen, Kyushu aser Shikoku asetkong na nung tentetba nuclear plant asemprongla nung timtem ajurua maliba osang ka Japan’er Nuclear Regulation Authority-ia metetdaktsüogo.