Japan menoknok nung asür 35 jungogo

Tokyo, Rongjui/September 8 (Agencies): Northern Japan nung menoknok tesashi ka anokba koba ajanga anentsüh aludakja liasü, iba lendong nung asür Küptoknü tashi nung 35 jungogo. Tang tekümzükertem meyirejang aikati lishi nung taküm alirtem kümzüktsü asoshi inyaktepdar.
Nisung asürtem timbaka Atsuma jila nungi lir, kong menoknok ajanga tenem ka anensaja liasü.
Public broadcaster NHK-i ashiba agi, nisung tasüba 35 junogo aser jila nung alir nisung pongu tashi kechi tia nung aliar mejangja.
Iba lendong nung nisung 600 dak tema yiruogo, ta Hokkaido island local government sangdong ka ajanga metetdaktsü.
“Iba tesem nung kodanga anentsüh malur,” ta Akira Matsushita-i ashi, shiba adianu ka iba lendong nung süogo.
“Ni mangu tashi mamangi liasü. Ni lendong atalokba anguba sülen shinga mekümzüktsü ta meteta aru,” ta TV Asahi dang ashi.
Bulldozers, sniffer dogs aser helicopters 75 dena tekümzüker 40,000 shi aser Self-Defense Forces puri taküm alirtem kümzüktsü asoshi merangdar, ta sorkar otongdar kati ashi.
Ato Kilonser Shinzo Abe-i ashiba agi, pai menoknok lendong nungi jenburtem den Amungnü ajuruteptsü.
Sangtennü menoknok ajanga electricity supply agütsüba thermal plant raksatsüba ajanga Hokkaido tesem nung alir nisung million 3 power supply tsütsü timtem ajurua arudar, ajisüaka Abe-i ashiba agi, power tanaben agütsütsü asoshi maparen timbaka tembanga inyakogo.
Tri Abe-isa, sorkari chiyongtsü, tzü aser mozüki nung generator atema totzü atema emergency fund agütsütsü.
Tang tashi nung kibong 31,000 tzü tajemtsü mali aser nisung 16,000 shi pei ki toktsür tekümzükdak jenoka lir.
Maneni iba menoknok ajanga Sapporo yimti nung ki aser wall tem ishikabo raksatsüogo saka menoknok anokba apibo tasüba kanga aikabo matalok. Tasüba timba ka Atsuma tesem nung anentsüh ajanga adokdaktsü.
Japan anüolen aso ka tesadang nung typhoon tesashitiba arua nisung 11 tashi asüba sülen anogo ishika tsüngda menoknok lendong ajanga kongshiogo.