Japan-Naga Christian Reconciliation & revival Summit temogo Zeliang-i Japan-Naga tsüngda rongsenren tsütsü tesentaktep alitsü ayongzük

November 29. 2015 nü NBCC Convention Hall, Kohima nung Japan-Naga Christian Reconciliation & Revival Summit nung Japan nungi Senior Pastor, Rev. Jun Takimoto-i jembiba noksa nung angur.  

Kohima, November 29 (TYO): Deobarnü Nagaland Chief Minister, TR Zeliang-i Japan aser Naga nunger tsüngda rongsenren tsütsü terenlok atema tesentaktep alitsü tayongzükba agütsü.
Anogo ananü Japan-Naga Christian Reconciliation and Revival Summit nung Revival Service agidang TR Zeliang-i All Japan Revival Mission nem tenüngsang agütsüogo.
“Japan revival mission-i mapa tajung ka inyakogo. Kohima rara mapang Japan aser Naga nunger tsüngda raratep, kechiyong iba mapang Naga nungerji British nunger yimsüsüba kübok liasü” ta Nagaland chief minister-isa metetdaktsü.
Telok anaprong nungi rarartemi pei teinyaktsü mapa inyak aser Battle of Kohima dak dang rangloker jembira, iba rara nung war crimes maliasü. Iba rara nung Naga civilians mesüra prisoners of war dak tashiyim mapa inyakba tatalokba kecha mangazük, ta TR Zeliang-isa shisem.
“Naga aser Japan nunger tsüngda tsükchitep mesüra temulung mesütepba ken o kecha maliasü. Ajisüaka, kodang asenoki Khristan tangatetba tsütsü nungi reprangdangdir, asenoki anogoshia asen külem meimchirtem den yimjung yanglutsü nüngdaka lir” ta paisa ashi.
Chief Minister-isa ashiba agi, Japan aser Naga nunger tsüngda yimjung yanglubaji tatembang masü saka tesentaktep tasen ka atema tetenzüker lir.
Japan ji technology tsütsü kanga dang terenlok aliba linük la lir aser asenoki parnok den rongsenren tsütsü tesentaktep yanglura Nagaland kanga tajangzük angutsü, ta TR Zeliang-isa ayongzük.
“Nenok (Japan)-i onok nem tanü-asüng amshiba technology aser developmental teyari agütsütettsü. Iba asoshi onokia nenok nem Naga King Chilly agütsütsü, kechiyong India Prime Minister-ia iba mersü nung mozü aika keta lir ta shiogo. Onoki nenok nem English tesayurtem aser kentenertem teyari agütsütettsü, kechiyong ozü lanurtem tajung aika lir” ta paisa shisem.
Deobar nikongtsütsü NBCC Convention Centre nug agiba sentong nung mendenji Senior Pastor, First Assembly of God Church Kohima, Rev. Dr. T R Angami liasü aser Senior Pastor, Shinshiro Church, Aichi, Japan, Rev. Jun Takimoto-i o jembi.
Sentong nungsa AJRM nungi Tim Kepler, Ajeen Longchari, Ameü Üsou Zao & choir aser NCRC choir nungeri ken ajanga shilem agi aser Nagaland Christian Revival Church President Rev. Dr. R. Paphino-i tenüngsang agüja sarasadem.