Japan nübur lakh 1 dak temai pei talidak toktsütsüsa akümer

Etau yipru lendong atalokba sülen tzünglu kanga sashia aruba ajanga Japan anüdoklentip tsütsü, Ibaraki prefecture nung densemba Joso jila nung tzü agi metsüngbangba aliba ki kilung nung nüburtemi rescue helicopter tayimtsü arua parnok kümzüktsü asoshi ataba noksa nung angur. (Joso, September 10)

 Joso, September 10 (Agencies): Japan nung tzünglu tanen makai kangasa sashia aruba ajanga nübur lakh 1 dak temai pei talidak toktsütsüsa tia ajuruba osang jangjaogo.

Japan kübok Honshu asetkong nung Etau ta ajaba yipru mupong tesashi aonba sülen Tokyo yimtiba anüdoklentip tsütsü densemba tesemtem nung taoba ghonda 48 tsüngda nung tzünglu kanga sashia aruba ajanga Japan tesem balala nung tzümetsüng tulu bener arutsüba osang bushiteta lir.

Tan atalokba tzümetsüng lendong nung nsiung 17 shi yiruba aser nisung 2 tashi samar bushiba osang tang tashi nung jangjaogo.

Japan’er resue ketdangsertemi par helicopter tayimtsü amshia pei ki kilem nung jenoka alir nübur jenti kümzüka tesem tangai anir aoba osanga jangjaogo.

Tokyo yimti nungi anüdoklentip tsütsüleni kilometer 56 shi pilar, Joso jila nung tzünglu tesashitiba, 500mm aruba osang ka sorkari ketdang asüba NHK television osangia metetdaktsüogo.

“Ozü helicopter tayimtsü 12 tashi amshia tan lendong ajurushia alirtem kümzüka anitetba maparen inyaktsü tenzüka lir. Ano, tan lendong nung nisung yiruba osangji tang jangjaba den timba akümtsü,” ta rescue ketdangsertemia metetdaktsü.

“Tan lendong ajururtem kümzüka anitettsü maparen aser tarutsü mapang nung tan ajuruba ama lendong nungi nüburtem kümzüktsü maparen tali bendanga agüja inyaktsü nangzüker,” ta Japan Ato Kilonser, Shinzo Abe-ia tanü sangoktsüogo.