Japan nung ‘parasite plant’ tasen ka ngutetogo

Tokyo, February 21 (Agencies): Japan Yakushima asetkong nung scientists temi parasite plant tasen ka ngutetogo aser iba tesem dak jaloka, Sciaphila yakushimensis ta tenüng agütsüogo.
Anü nungi tashi magi-i taküm aliba, parasite plant ya Kobe University Graduate School of Science nung Project Associate Professor Suetsugu Kenji-i ngutet.
Iba parasite plant yagi anü tashi ajanga chiyungtsü meyanglur saka parasite ka mesüka tanga ‘fungi’ dak nungi chiyungtsü agia item dakji metaloker alir. Iba den külemi iba arem nung aliba temo nungia chiyungtsü agir.
“Iba parasite plant ya arem chitoktsü temelaba agüja aliba tesem ka nungi ngutet. Sciaphila yakushimensis ngutetba ajanga Yakushima arem min ya alemli nungi liasü ta kuli angur,” ta Kenji-i ashi.
Aji oda süaka Sciaphila yakushimensis ya kanga tila aser tepen ponga naro apongba mapang ang ali temai mokoteta adoker. Anungji iba parasite plant indang osang tejangja ajakbo ano mongutet, ta Kenji-i iba bushisüngdang indang Japanese Botany kaket nung adoktsüba osang nung shia lir.
October 2015 nung Kenji-i Yakushima arem nung aliba mangrangtem asadangba mapang anü tashi magiba parasite plant ya nguteta bushisüngdangtsü tenzük.
Iba centimetre 5 talang parasite plant ya ‘Triuridaceae, Sciaphila japonica’ den tesentaktep tulu lir amai sayu ajisüaka khenyongi balala lir ta ngutetogo.