Japan nunger kati ‘WalkCar’ ka yanglutetogo

London, August 10 (Agencies): Japan nunger engineer kati asenok oli aruli jajatsü asoshi asen juli nung asemtsüsa gari tila ka yangluteta lir.
Iba gari dang ‘WalkCar’ ta ajar aser asen juli nung bener senzüteter. ‘WalkCar ya charge sülibo ghonda nung kilometre 10 kara oteter saka iba sülenjibo ghonda nung kilometre 12 ang kara oteter. Iba gari ya temang arakzüba yimya agi mele mela meyipshiteter, ta Daily Mail osang ajanga metetdaktsü.
Cocoa Motors nung arishi küm 26 tain, Kuniako Saito aser pa den külem inyaker teloki lithium battery ajanga amshiba ‘WalkCar’ transporter ya tawa ang saya liasü. Iba gari ya laptop tika dang aser gari dang nungibo skateboard temesükba lir.
Saito-i iba gari ya mapa aika atema amshitettsü yimlar aser pai ashiba agi, ‘WalkCar’ yagi wheel-chair-a mela mela nunger oteter.
Iba gari ya aluminium agi yangluba ajanga kanga tepongba lir aser iba yagi seret 120 tashi akoker.
WalkCar nung ya asenok tuagi dang nokdak nung pa sasa apusor aser asenok alu nung pa sasa anener.
Ajak dang tajungbaji, iba gari anena ayutsü tesem tenüngdaktsü mali kechiba süra gari ya mamshidangbo yangkhu tila ka nung enoka bener jajateter.
“Asenok jajatsü gari asenoki ama’er senzütet nungbo koda, aser yamaji sütet nungbo asen jajatsü gari asenok den teti alitsü, ta ni bilema liasü,” ta pai ashi.
WalkCar ya taginertemi ita ishika sülen parnok website Kickstarter ajanga talitsü asoshi maka-a yutettsü aser gari ka nung US sen 800 shi asütsü, ta Saito-i ashi.