Japan o Brazil nati shishilembatsü tezüngzüktep agir

Tokyo, October 19 (Agencies): Japan aser Brazil linük nati shishilembatsü aser kiojen terenlok lidaktsütsü tezüngzüktep agiogo.
Brazil Tir, Michel Temer-i Japan semdanga, Japan Ato Kilonser, Shinzo Abe den ajurutepa senden amenba sülen par linük anati tan tezüngzüktepji tanü, Bodbar nü agi.
Tan tezüngzüktep agiba sülen South America nung tentetba linüktem rong rong rongsenren sabang tulutiba alir, Brazil nung Japan nunger kiojen tasa amshia, kiojen terenlok lidaktsütsü renemogo.
Ano, par linük anati transport, logistics, information technology aser energy sabang nunga amaliteptsü nangzüktepogo.
“Brazil aser Japan na tsüngda tesendaktep tajung ayuba ajanga ozü linük anapronglai arok tajangzük angutsü imlar. Ozü linük anati tang kiojen terenlok lidaktsütsü aser shishilembatsü tezüngzüktep agiba ajanga iba alizüngji asangsang nung ajangzüktsü imlar,” ta Abe-i Temer den aroki osangbener den ajurutepdang metetdaktsü.
Küm 11 tsüngda nung Japan semdanger mezüngbuba Brazil Tir akümsang, Temer-i tan Japan semdanga ajanga pa jakdang Brazil Tir menden abenla, Dilma Rousseff-i Japan semdangtsü sentong anaben tashi thija, tesendaktep mejungi akümbaren tajungba kümdaktsütsü mapatong inyakba osang jangjaogo.
“Japan-i Brazil’er tayimtsü anendak, totzü aser meimchir nem teyari agütsüba tango balala sabang nung tongti shilem agitettsü. Ni Japan shishilembartem den ajurutepba sülen parnoki ozü Brazil nung shishilembatsü sabang temaba jenjang nung ajungkettsütsü jangraba osang angazükogo,” ta Temer-ia metetdaktsü.