Japan o China nati tesendaktep junga ayutsü nangzükteper

Tokyo, October 14 (Agencies): Japan aser China nati tesendaktep junga ayutsü tezüngzüktep ka Japan Ato Kilonser, Shinzo Abe aser China’er tongti yimsüsür, Chinese State Councillor Yang Jiechi nati tanü Bodbar nü agiogo.

Japan-i tesüiba mapang, World War II (WWII) nung ozüng alema tashiyim inyakba aser East China Sea nung densemba asetkongtem den sentakba mangatettep ken o benoka liaka par linük anati tesendaktep junga ayutsü telemtetbaji tanü agia liasü.

Par linük ana tsüngda mapang talang ka tesendaktep mejungi arur külen Abe-i China Tir, Xi Jinping den anaben tashi yaküm November ita ajurutepba sülen par linük ana tsüngda tesendaktep tajungba akümtsü tenzükba osang bushiteta lir.

Ajisüaka, China-i itangiba ken o nung ajemdaker Japan senso 2 taoba September ita pua ayuba aser 1937 Nanjing Massacre ken o nung ajemdaker Japan-i UNESCO yariba maparen anentsü osang ka tan hopta amokmerena sangoktsüba ajanga par linük ana tsüngda bilemba ama tesendaktep junga meyutettsüsa akümba osanga bushiteta lir.

“China aser Japan na ya kidangsüa aliba linük lir anungji, ozü linük ana tsüngda tesendaktep tajung ayutsüji kanga dang tongtipang,” ta Jiechi-i tanü Abe den senden ka amenba sülen metetdaktsü.

China Tir, Xi aser China Ato Kilonser, Li Keqiang na den taküm küm tatembanglen ajuruteptsü yongyba olen ka Abe-ia tanü lemsatepa liasü.

Taruba November ita Turkey nung G20 Summit senden aser Philippines nung Asia Pacific Economic Cooperation (APEC) senden amentsü ayonga lir aser idangji Abe-i China lenirtem den ajuruteptsü sentong renema lir.