Japan o S Korea nati miim osangtsüsang lemsateptsü nangzükteper

South Korea yimtiba, Seoul kübok Defense Ministry nung S Korea Defense Minister, Han Min Koo (Achijilen) aser Japan’er S Korea Ambassador, Yasumasa Nagamine nati par linük ana tsüngda miim osangtsüsang lemsateptsü General Security of Military Information Agreement tezüngzüktep zülutepa agiba noksa nung angur. (Seoul, November 23)

Seoul, November 23 (Agencies): Kidangsüa aliba North Korea-i tongpang raratsü maparen inyakba meteta alitsü aser kasaji nokdangtsü nükjidong nung Japan aser South Korea linük nati par linük ana tsüngda miim osangtsüsang lemsateptsü tezüngzüktep ka tanü, Bodbar nü agiogo.
2014 küm linük 3 densemba tezüngzüktep agiba sülen Seoul aser Tokyo nati United States (US) ajanga par miim osangtsüang lemsatep saka par linük ana tsüngdabo tsüngdong itangitsü aser iba amala miim osangtsüsang lemsatepa maru.
S Korea defense minister aser Japan’er S Korea ambassador nati tanü tezüngzüktepji zülutepa agiba sülen iba tezüngzüktepji tanü nungisa mapa küma inyaktsü renemba osang ka Seoul’er foreign ministry-i metetdaktsüogo.
Ajisüaka, “Japan aser S Korea nati tan miim osangtsüsang lemsateptsü tezüngzüktep agiba ajanga par linük densemba region nung tsükchitep aser mangatettepbaren taoba mapang nungi tesashiba akümtsü,” ta N Korea-i kanga jashia metetdaktsüogo.
US aser United Nations (UN) densema, Pyongyang-i alima ashi mangai tesüsa par 5 buba tongpang nung amshitsü nuclear bomb taküm 2016 küm September ita tendanga pokdaktsüba sülen alima talisa, kidangsüa aliba linüktemi tebilemtsü khuret benoktsü tenzüka lir.
Ano külen, tang S Korea Tir, Park Geun-hye anema benokba Tir menden toktsütsü ken o amadaktsütsü nükjidong nung par sorkari tan Japan den tezüngzüktepji agir ta shia, S Korea opposition teloki aitsüba olen ka sangoktsü saka S Korea sorkari iba aitsüba olenji magizüki lir.
Japan-i tesüiba mapang, 1910 nungi tenzüka, 1945 küm tashi Korea madak tashiyim agi yimsü asüba sülen Korea linük US linüki pusemba S Korea aser Soviet Union-i pusema nungitba N Korea küma ana küma lemdang.