Japan parliament dissolve süogo

Tokyo, September 28 (Agencies): Ajungbena election agitsü sangdongba sülen Japan Ato Kelonser Shinzo Abe-i parliament indang lower house dissolve sütsüogo.
Iba election agitsü osang ya Hombarnü sangdong aser küm ka agi jelia October 22 nü agitsü.
Tang North Korea nung nuclear tebilemtsü adoker aliba tensa ka nung nüburtemi Abe sabuba tajemba aküm, aser iba ajanga election ya agishitsüsa aküm.
Liberal Democrat Party (LDP) ajanga Japan nung coalition sorkar tenteta iba telok nungi Abe ya 2012 nungi ato kelonser mapa inyaka arur.
Tongtibang mapa inyaktsü asoshi tetemsü nübu masü tejak ajia shimba maparen nung Abe ya taküm küm tetenzüklen aitsüba sülen par linük nung pa sabur tajemba aküm.
Saka Japan alema North Korea-i ballistic missile ana khaloktsüba anema Abe-i kanga akhang akhanga nokdakba yong pa busemer tera timba renlok.
Japan opposition telok tashi maitba ngua pai election ya mapang matongdang agitsü lemtet aser opinion poll nunga LDP telok ya temaba jenjang nung lir.
Saka pa den tokteper telok tasen, Party of Hope Bodhbarnü saya aser iba telok busemer nütsüng renloktagi.
Iba telok ya nüburtemi kanga junga meteta aliba television news anchor aser Tokyo indang mezüngbuba tetsür angh, Yuriko Koike-i ania lir.
Tang Japan nung opposition telok tuluba, Democratic Party nungi lenir aika Party of Hope nung oa denogo.
Brehostibarnü Democratic Party nungi lenirtem dang Party of Hope den lungjemer Abe aser LDP den tokteptsü ajungshi.