Japan PM, Abe-i Argentina semdangtsü

Buenos Aires, November 19 (Agencies): Japan Ato Kilonser, Shinzo Abe-i Argentina linük taruba Hombar nü semdangtsü sentong renemba osang ka Argentina sorkari tanü, Honibar nü metetdaktsüogo.
Latin America linük, Argentina den rongsenren tesendaktep tajungba küma yanglushitsü nükjidong nung Abe-i anogo ka agia Argentina semdanga, par Tir, Mauricio Macri den ajuruteptsü sentong renemer lir.
Taoba Japan lenirtemi tesüiba küm 12 tashi Argentina den rongsenren tesendaktep junga meyui aruba sülen Abe-i küm ka tejaklen nungi tenzüka, Japan lenisütsü menden benokba sülen par linük ana tsüngda rongsenren tesendaktep taoba mapang nungi tajungba küma yanglushitsü atema meranga inyakba osang bushitetogo.
Peru nung amenba APEC shishilembatsü mongdang nung shilem agiba sülen Abe-i Argentina semdanga idakji alir Japan nunger shishilembar nisung 65,000 shi den tsüngdong ajuruteptsü sentonga renema lir.
“Ozü lenisang, Abe-i tan otsüsütsüsa Argentina semdanga, ozü linük ana tsüngda shishilembatsü tesendaktep tajungba küma yanglushitsü maparen tenzükogo,” ta Argentina yimtiba, Buenos Aires nung tenzüksang, Japan Ambassador, Noriteru Fukushima-i metetdaktsü.
“Tan Japan lenisang, Abe-i ozü linük semdangba ajanga ozü Argentina aser Japan na tsüngda yimtenren, rongsenren, sobaliba, saisapongtsü aser science & technology sabang nung amalitep aser terenlok alitsü imlar,” ta Argentina foreign ministry-ia metetdaktsüogo.