Japan yimsüsür, Natsuo-i Xi den ajurutep

Tokyo, October 16 (Agencies): China den tesendaktep tajungba küma yanglutsü jangraba olen ka Japan sorkari tanü Hokolbar nü metetdaktsüogo.

Japan Ato Kilonser, Shinzo Abe-i aniba teloktep sorkar nung densemba yimtenren telok, Japan’s New Komeito Party (JNKP) lenisang, Natsuo Yamaguchi-i China Tir, Xi Jinping den Beijing yimti nung yashi Brehostibar nü ajurutepa Xi Tokyo taruba 2017 küm semdangtsü jaokba sülen Japan sorkari tanü iba olenji metetdaktsür lir.

“China lenisang, Xi-i ozü Japan linük semdanga Tokyo nung cherry naro tebur junga apongba reprangtsü imlar,” ta Yamaguchi-i yashi Xi den ajurutepba sülen metetdaktsü.

Ajisüaka, pai Xi nem yashi amoktsüba Japan semdangtsü shiti nung kechi onük zülua ali iba osang den sentakba osang tejangjabo memetetdaktsü.

“Sangküm amentsü ayongba Japan-China Summit senden den sentakba terenemshitsüren tatem küma agia mali. Ajisüaka, ozü Japan o China na tsüngda tesendaktep junga yanglutsü alizüng ozü sorkari yua lir,” ta Japan’er Chief Cabinet Secretary, Yoshihide Suga-ia tanü metetdaktsü.

“China den sabang ajunga nung tesendaktep tajung alitsü alizüng yua lir aser iba den sentaktepa, Yamaguchi-i tan China semdangba ajanga tajangzük tulu angutsü imlar,” ta pai shisem.

Ajisüaka, Japan mitkartemi tesüiba mapang, World War II nung tashiyim inyakbaren mamadoktetba den külemi, China-i East China Sea nung par mitkar terenemshiba maparen kanga sashia inyakba ajanga par linük ana tsüngda tesendaktepji bilemba ama meyanglutettsüsa tia aiben ajuruba osang bushiteta lir.

Ano, Xi-i küm 2 tejaklen nungi tenzüka China lenisütsü menden benokba sülen tanü tashi kidangsüa aliba Japan linük ken danga semdanga mali.

Abe-ia tashishitsü aketba Yasukuni war shrine semdangba ajanga China jashidakja par linük ana tsüngda tesendaktep mejungi kümdaktsütsüba osanga bushiteta lir.

Ajisüaka, taoba küm 2 tejaklen nungi tenzüka par linük ana tsüngda tesendaktepji taoba mapang nungi tajungba akümtsü tenzüka lir.