Japanese sepaitem indang mang bushitsü arua lir

September 10, 2019 nü Chief Secretary indang Conference Hall nung Principal Secretary, School Education, Menukhol John aser Nagaland sorkar ketdangsertemi Japan nungi aruba teshimtet telok den külemi agiba noksa angur. 

Dimapur, September 10 (TYO): Japan nunger teshimtet telok kati September 10 nungi 20, 2019 tashi Nagaland state semdangi arua lir, aser tanü state sorkari parnok den ajurutepa senden ka amen.
Iba teshimtet telok ya Japan Association for Recovery & Repatriation of War Casualties (JARRWC) lir aser tanü Nagaland Chief Secretary indang Conference Hall nung parnok den sendenji amen
Rara tembanger küm 74 tashi süiogo saka Japan nunger sepaitem tasümang million 1.12 tashi parnok linüki bener mao lir. Tasür kibongtemi mang bener arudaktsünüba atema Japan-i parnok sepaitem senzüba tesem temi oa osangtsüsangtem bendener.
Nagaland-i JARRWC telok aruba ya mezüngbuba shilem lir aser tang parnoki Kohima district kübok Jotsoma, Kigwema, Riisoma yimtsüngtem semdangtsü.
Team leader, Kazuhiko Furumoto-i sorkar ketdangsertem dang iba survey mission nung yariteptsü aser nüngdakba mapang parnok nem security agütsütsü atema mepishi.
Paisa Anthropology Department, Kohima Science College dang nungia teyari meshi.
Maneni, November 10 nungi 24, 2019 tashi parnoki Nagaland tanaben semdangtsü aser idangji lendenlen dang masü saka tenemlen asemtsü. Iba mapang Wokha district kübok Yikhum aser Chakhabama, Jessami tesemtem semdangtsü, ta Kazuhiko Furumoto-isa ashi.
Tanü senden nung state sorkari parnok den yariteptsü nangzük.
Iba senden nung mendenji Principal Secretary, School Education, Menukhol John liasü aser pai Naoko Andou’er kibong den asükhu lemsatep. Tan aruba teshimtet telok nung Naoko Andou’er kinungertem dena lir.
Senden nungsa Commissioner & Secretary, IPR V. Maria Yanthan, SP Kohima Kevithuto Sophie, Tourism, Art & Culture nungi ketdangsertem aser Kohima Science College Principal aser Department of Anthropology tesayurtem aden.