Japan:Helicopter ka nung nisung 9 mener tsükok

Tokyo, March 05 (Agencies) : Deobarnü Nagano prefecture, central Japan nung Helicopter ka tsükokba tesem nung tang tekümzükertem kanga mazüngi inyakdar. Iba rescue Helicopter nung nisung 9 mener training agiba mapang rür agi sünga aliba tenem nung lua tsükok.
Iba lendong nung tajemba agi nisung asembosa sür alitsü ta tamang makar, ta ketdangsertem aser osangbenertemi ashi.
Iba helicopter Nagano prefecture, central Japan nung tsükoker alibaji police indang helicopter kati ngutet, ta osangbenertemi ashi.
“Onoki nisung asembo temunglungjang arakzüba anener lia ngutetogo ajisüaka tanüngba nisung trokji ano mangu bushidar,” ta Fire & Disaster Management Agency nungi ketdangser kati osangbenertem dang ashi.
Japan nunger ketdangsertemi teti nunga tasümangtem kanga junga tendanger ang asü masü metetdaktsür.
Tsükokba helicopter nung mena alir nisung 9 prongji rescue worker tem aser sorkar mapa nung ketdangsertem liasü. Parnok ya training agitsü asoshi aoba mapang iba lendong ya ajuru, ta osang ajanga ashi.
Tang mongui aliba nisung trokji police aser ketdangsertem senteper bushidar, ta sorkar ketdangser kati metetdaktsü.