Japfu & Dzukuo morok mi atema senden ka agi

Dimapur, January 30 (TYO) : January 29, 2016 nü DC conference hall, Kohima nung Japfu aser Dzukuo nung morok mi khuret dak sendakba onüktem asoshi senden ka ayongzüka agi.
Iba senden ya Kohima DC Ruovilatuo Mor IAS lenisüba kübok agi aser district administration, Department balala, NGOs, lanur aser kaketshir tentettem aden.
Iba onük atema jembidang SAPO aser SAYO-i ashiba agi, morok mi lendongji January aser February itatem nung ataloker aser aiben iba lendongji picnic aser hiking arurtem ajanga adokdaktsüba putetogo.
Item mapang nung Dzukuo atema dang masü saka Viswema, Khuzama, Jakhama, Kigwema, Phesama tesemtem asoshi entry pass amshi nung ajungtsü, ta DC-i ashi.
Senden nung Defence tenüng nungi arurtemi 2014 January aser February itatem nung Japfu aser Dzukuo nung morok mi aoba noksatem kar sayu aser parnoki ashiba agi, morok mi noktangtsü atema yimtsüngtem nem awareness agütsütsüla.
Ano, Home Guards Department-ia ashiba agi, sorkari iba khuret atema mapa inyaktsüla aser iba nung NGO, kaketshir tentet, village council aser Arogotem ajaki shilem agir tesemtem nung temetettsü aser signboards yutsü nung ajungtsü.
Morok mi noktangtsü atema mapa inyaktsü asoshi sen balala lemzüktsü nung ajungtsü aser ano kaketshirtemi nübo agüja mapa inyak nung ajungtsü. Item mapang nübodoker nem badge tags mesüra caps aser training agütsütsü akok, ta SDO (Civil) Kohima, Samuel Paul-ia tebilemba lemsatep.
Japfu aser Dzukuo tesemtem nung awareness camps agitsü atema DFO nem mapa lemzüktsü.