Japu nungi Longtho lenmang tasen ka semzükogo

Japu, Jan.6, 2016 : Japu nungi Longtho tashi Lenmang tasen ka Dr. Benjongliba Aier, Parliamentary Secretary Agriculture & Chairman NSAMB ajanga tanü semzüktsüogo.
Iba lenmang ya Kilometer 7 shi lir, aser Longtho nungi Japu ajanga Mangkolemba tashi nung Kilometer 10 shi dang lir.
Iba lenmang semzüka Dr. Benjongi jembidang, “tanü nübortemi government dak dang metaloker litepba mapang ka nung Japu nungeri government dang nungi kecha teyari magii dang pei sasa meranga inyaka iba lenmang lapoktetba asoshi pelar aser ibai alima asoshi tatishitsü tajung” ta ashi.
Japu yimtak Sangbang zünga kümer lia aruba küm tenem “Golden Jubilee” tenüng nung Japu Arogo nung New Year benjong agütsüba den Yimten den tangatettep nung yaritepa ita ana tsüngda iba lenmang Sangpang züngai renemtsü. Iba lenmang ya Japu nunger kija asoshi masü saka Japukong, Changkikong, Asetkong ano Mokokchung item ajak tongtettsü iba lenmang ajanga kanga anasaba kümdaktsüogo.
Dr. Benjongi lenmang semzüktsüba den Japu Alongsüngküm Clubi ayongba 2nd Friendship Volley Ball Trophy, anogo ana Jan. 6-7 tashi asayaba sentong lapoktsü.
Iba Trophy nung asayartemji, Nokpu Sporting Club, Changdang Sporting Club, Young Sporting Club Lakhuni, Alongtaki Sporting Club, Sporting Club Mangkolemba, Torclan Sporting Club Mangkolemba, Japu Alongsüngküm Club aser Longtho (Japu-B) Sporting Club nungertem lir.