Japukong Arkotong J.N.Aier alima nungi pilaogo

Dimapur, Feb.12 (TYO) : Japukong nung arkotong, Wabong Ngangshikaba Aier tanep Hokolbar anepdang par yim Yajang ‘C’ nung lia iba lima nungi pilaogo. Pa arishi küm 98 liasü.
Asür Ngangshikaba tebu ya Jepdakyangba liasü, ibayongji pa nüng tatsüba agi J.N.Aier ta amshia aru. Pa ya tang Nagaland nung Parliamentary Secretary, Dr.Benjongliba Aier tebu liasü. Pa Japukong nung dang masü saka Naga nunger rongnung mezüng kaketshisatsü bushiba nung takok ngua jenjang tajung anguba tashitemeteter aser tesayur ka liasü.
Pa lanuwa par yimtak class A & B zünger, Impur Mission School nung class 4 tashi azüng aser Jorhat Mission High School nung class X tashi renemer 1946 küm Cotton College, Gauhati nungi Intermediate Arts (IA) renem aser iba sülen Gauhati Univeristy nungisa B.A. Hons (Education) renem.
Pa lenisüba nung Japukong Tzükong Mungdang aser Japukong Kaketshir Mungdang tenzük. 1945 küm Alongtaki nung Japukong Tzükong Mungdangi UP school ka lapoker Headmaster inyaktsüsa nübo menguteti alidang pai pa taküm tenla agüja iba mapaji agizüka inyak. Iba mapang nung jagi tenzüka pai pa taküm aser mapang ajak tangar tajung kümdaktsütsü asoshi tesayur inyakba mapa nung bendanga agüja inyak. Item mapa tajungji reprangteta pa nem 1997 küm Japukong Tzükongsangeri ‘Arkotong’ naroküm agütsü.
Wb. J.N.Aier asüba osang angashia, Nagaland Chief minister, T.R.Zeliangi asür kinungertem den mangyim jashi lemsatepba osang ka metetdaktsüogo.
“Asür J.N.Aier ya tashitemeteter ka liasü, pai pa taküm ajunga lanurtem nem shisaliok tajung agütsüba maparen nung bendanga agütsü. Pa asoshi tepela tulutibaji pai sayuba kaketshirtemi takok tajung bener aruba mapaji liasü. Tanü pa ama tarutsü putu asoshi bilema bendanga agüja sayur tesayur tajung nüngdaker. Pa taküm ajanga nisung aika tajung kümdaktsüogo,” ta T.R.Zeliang-isa metetdaktsü.
Asür J.N.Aier den asüpila sentep Honibar nü 11:00 ako nung Yajang ‘C’ yimtak alitsü sentong renema lir.