Jason Momoa-i ‘Sweet Girl’ produce asütsü

Chiteni/July 30, 2019 (Agencies): Netflix indang taruba thriller film – ‘Sweet Girl’ nung Jason Mamoa-i shilem agiba den külemi pai iba film produce asütsü ternemba lir.
Iba film Gregg Hurwitz aser Philip Eisner nati zülutsüogo, koba Will Staples-i iba script asadanga renemtsüogo. Nüngtugu streaming service atema arishi küm 39 tain Jason-i shilem agia aser kasa mapang produce asütsü aliba film ya Brian Andrew Mendoza-i direct asütsü. Osang ajanga angazükba agi, film ya mangyangba otsü ka asütsü.
Ajisüaka, film tangok tenzüktsü asoshi anogo aser mapang tejangja agüja mali. Aquaman nung tongti shilem agisang Jason-i iba film nung la kinungtsü asüba mangyangtsü atema pai tashiyim agi ozüng alema pa sasa medena mapa tamajung inyakba aser kasa mapang item nisung nung jagi pai par jala kümzüka ayutsü merangba indang otsü asütsü.
Tang Jason-i Mendoza den longjemba ya mezüng masü. Jason-isa Netflix aser Discovery Canada indang TV series ‘Frontier’ aser iba denji külemi 2018 action film ‘Braven’ atema Mendoza den longjema inyakogo.
Sweet Girl film Jason den ASAP Entertainment nungi Brad Peyton aser Jeff Fierson napronglai longjma produce asütsü, kasa mapang Martin Kistler-i project atema executive producer ama inyaktsü.
”Netflix den tanaben longjemtsü asoshi ni yongyaseter. Brad aser Jeff na den aser talisa kü tembar tajung Brian, shibai küm 10 dak tema kü den longjema inyaka arudar, parnok den külemi mangdang ka yanglutsü. Pa den longjema aser pa nükjidong ataloktsütsü maparen ya pungmang ka ataloker ama lir,” ta iba project nung Jason adenba osang pai jangjatsüdang metetdakja liasü.