Jaswant Singh’er jabaso Manvendra Congress Party nung denogo

Jaipur, Mongputeni (October) 17 (Agencies): Rajasthan nung assembly election agitsü lia BJP lennir tejen Jaswant Singh’er jabaso Manvendra Singh-i Mongulbarnü Congress nung aden.
Manvendra-i Congress nung züngsem makümdang Ashok Gehlot, Sachin Pilot, Avinash Pande aser Randeep Surjewala nungertem lia Congress tir Rahul Gandhi den mezüng ajurutep.
“Ni anepdang Rahul Gandhi den ajurutep aser pai ni party nung pelashishia agizük. Ni yaria arurtemi maneni ni nungittsü ta tamang lir” ta Manvendra-i ashi.
Manvendra parnok den adenba ajanga Rajasthan assembly election nung Rajput vote tem angutsü ta Congress-i bilemer.
Taoba ita Barmer nung ‘Swabhiman Rally’ alidang Manvendra-i BJP toktsütsü indang osang mezüng metetdaktsü.
Külen, Bharatiya Janata Party (BJP)-i ashiba agi, Manvendra Congress nung adenba ajanga Rajasthan anüolen tsütsü parnok timtem kecha majurutsü.
“Manvendra Singh-i telemtetba tai agiogo, kechiyong ibaji ajanga BJP atema timtem kecha marutsü. Rajput nunger vote ji BJP den dena lir aser yamaji dang asütsü,” ta Parliamentary Affairs Minister Rajendra Rathore-i ashi.
Rajasthan nung December 7, 2018 nü assembly election agitsü.
2013 assembly election nung Manvendra Singh-i Sheo assembly constituency nungi BJP candidate ka ama takok angu.
2014 Lok Sabha elections nung pa tebu Jaswant Singh nem BJP ticket magütsü aser iba jagi pai (Jaswant) independent candidate ka ama toktep saka BJP candidate Sonaram den tamakok angu.
2014 Lok Sabha election nung Jaswant Singh nem ticket magütsüba atema Rajput nunger mepela aser iba atema parnoki Chief Minister Vasundhara Raje nem tai tongloktsü.