Jat kin-i akhangba agizükogo: Haryana CM Khattar

February 20, 2016 nü Meerut nung Jat kin-i Other Backward Class (OBC) category kübok sorkar mapa balala nung shilem mekazüka yutsütsü takhangba agüja lungkak aitdang parnoki Haryana Chief Minister, Manohar Lal Khattar mesüka yangluba noksa ka rongtokba angur. 

Chandigarh, Feb. 20 (Agencies): Haryana nung Jat kin-i lungkak aita Other Backward Classes (OBC) category kübok sorkar mapa balala nung shilem mekazüka yutsütsü (reservation) akhangba manentsü ta reprangteta tanü Haryana nung BJP sorkari, Jat kini akhangbatem agizükogo, ta ashi.
Lungkak aitertem dang lungkak aitba anentsü mepishia tanü nikongdang sangdong ka ajanga Chief Minister, Manohar Lal Khattar-i, “Sorkari nenoki akhangbatem agizükogo, anungji nenok pei kidangi meyipa oang,” ta metetdaktsü.
Yashi Chandigarh nung party ajak senden ka amenba sülen osangbenertem den jembidang Chief Minister-i, “Jats nem reservation agütsütsü atema lenmang ka bushitsü,” ta metetdakja liasü.
Jats kin-i OBC kübok shisaliok rejutem densema sorkar mapa balala wazüka yutsütsü akhanger.
Iba dak sentakba nung tanü lungkak aitertemi, mapang shia parnok dang yazü menangzüktsüla ta shia sorkar dang, takhangba agizükbaji tezüluba nung kuli agüjang ta khangogo.
Yashi lungkak aitba mapang nisung ka asü aser state tesem ajaklen lungkak aitba ayimjema liasü aser tanü Khattar-i, “Lokti meyong kiojen raksatsüba ajanga shinga tajangzük mangutsü. Anungji lungkak aitertem aser lanurtem süngjemtsüla,” ta ashi.
Paisa nüburtem dang olulu nung mangmangtsüla, ta shiogo.
Haryana Chief minister-i, BJP MP, Raj Kumar Saini-i Jats takhangbatem anema noktaker ta osang prokba nungji sorkari ai-aura makar, ta ashi.
Kurukshetra MP, Saini-i Jats takhangba anema noktakba ajanga Jat kin kanga jashia liasü. Osang ajanga angazükba agi, Jats atema OBC reservation nung kongshira pa MP menden nungi alutsü, ta pai jembia liasü.