Jat kin-i Haryana sorkar nem March 31 tashi mapang agütsür

Chandigarh, March 18 (Agencies): Hokolbarnü Jat lenirtem teshimtet telok kati Haryana Chief Secretary aser state DGP ajurua reservation bill atema o lemtepogo aser parnoki, state sorkari reservation atema draft bill renemba ajanga temelung masür, ta shiogo.

Iba dak sentakba nung Jat kini parnok takhangbatem agizüktsü atema state sorkar nem March 31 nü tashi mapang lazüktsüogo.

Osangbenertem den jembidang Jat lenir, Yashpal Malik-i, “Onoki sorkar den  senden ka menogo. Iba mapang nung tangbo iba bill atema inyakyim kar dang inyaktettsü ta ashi. Onoki March 31 tashi sorkar nem mapang agütsüogo. Iba mapang tashi nungji kecha matalokra onoki April 3 nü senden ka mena maneni telemtetba agitsü,” ta ashi.

Taoba ita Jat nunger lungkak aitdang nisung 30 dak tema süogo aser Jat lenirtemi Manohar Lal Khattar’er sorkar dang, tanü, March 18 tashi nung sorkari parnoki akhangba mataloktsüra parnoki maneni lugkak aittsü ta amokmerena liasü.

Iba dak sentakba nung state nung tensa azüoktsü atema Centre-i sepai company aika state-i yokba den külemi state tesem aika nung mobile internet services anentsüogo.

Tanü state tesem aika nung mobile internet services anentsüogo. State nung Rohtak aser Jhajjar densema lendong ataloktsüsa aliba district aika nung 2G, 3G aser 4G internet service anentsüogo, ta ketdangsertemi ashi.

Iba dak alia nisung pongu mesüra iba dak tema adenshitsü memelaba osang distict  ketdangsertemi metetdaktsüogo.