Jat longkak aitdang sen crore 20,000 jenjang raksatsüogo

Chandigarh, May 14 (Agencies): Taküm February ita nung Jat nungeri sorkar mapa aser shisaliok reju balala nung parnok nem menden wazüka yutsütsü takhangba agüja anogo aika longkak aitba dak sentakba nung ketdangsertem tashimait bushisüngdangtsü atema Parkash Singh Committee tenteta liasü, aser parnoki police aser ketdangsertem tashimait bushitetogo.
Taoba mapang Uttar Pradesh aser Assam nung Director General of Police (DGP) inyaksang, Parkash Singh lenisüba nung committee-i bushisüngdangba osangji tanü state  Chief Minister, Manohar Lal Khattar ket nung agütsüogo.
Haryana nung longkak aitdang ketdangser 90 shii metetsümonga pei teinyaktsü mapa meinyakba bushitet, ano tesem kar nungbo ghonda aika mepetmesü adokdang kiojen raksatsüba aser auyaba tatalokbatemji ketdangsertemi mangu ama toktsü, ta report nung shia lir.
Taküm Feb. 7 nungi tenzüka Feb. 22 tashi Jat nunger longkak aitdang lanurtem timba ser tajemba agi nisung 30 asü aser nisung 320 dak tema yirua liasü.
Osangbenertem den jembidang bushisüngdangba luden tongti, Singh-i,  Jat nunger longkak aitdang sen crore 20,000 jenjang akoksaogo, ta metetdaktsü. “Kiralongrar telok, Lashkar-e-Toiba (LeT)-ia iba dang tamajungba meinyaktettsü,” ta paisa ashi.
Iba luden tentetba sülen anogo 71 tsüngda parnoki bushisüngdangba osang agütsüogo, anungji sorkari tashimait ketdangsertem nem temerenshi agütsütsü imlar.
Iba report anguba sülen Chief minister, Khattar-i, state sorkari iba osang asadangtsü aser tekaraba nung temerenshi agütsütsü, ta shiogo.