Jat lungkak aitdang asür 30 jungogo; 133 puogo

Chandigarh, February 26 (Agencies): Hokolbarnü Haryana Police tongti-i, state nung Jat nungeri parnok nem mapa wazüka yutsütsü takhangba agüja anogo 9 tashi lungkak aitba mapang asür nisung 30 jungogo, ta metetdaktsü.

Haryana Director General of Police (DGP), Y.P. Singhal-i, state nung lungkak sashia aitdang nisung 30 tashi süogo aser nisung 200 dak tema yiruogo, ta ashi.

Lungkak aitba ajanga state nung district 10 tashi kanga mejungi kongshia liasü.

Paisa, tensa azüoktsü atema Haryana sorkari meshiba army tem Hokolbarnü nung tenzüka state toktsür aotsü, ta ashi.

“State tensa kanga kara süngjemdar. Railway lenmang aser highways ajak lapokogo aser tanü (Hokolbar) nungi tenzüka mapang lemsar army tem toktsütsü,” ta police tongti Singhal-i metetdaktsü.

Pai ashiba agi, Hokolbarnü tashi nung FIR 713 benokogo aser nisung 133 puogo.

“Kiojen rongtoktsüba, sentong tamajung yangluba aser teraksatsüba nung shilem agir shinga danga tai matoktsü,” ta paisa ashi.

Haryana nung anogo 9 nü tashi lungkak aitdang lungkak aitertemi sorkar aser lokti meyong kiojen rongtoktsüba ajanga sen crore jenti takoksa nguogo. Iba den külemi shisaliok rejutem aser nija mozükitem rongtoktsü aser dokan aika nung auyaogo.

You must be logged in to post a comment Login