Jat nunger takhangba agizüker, taruba Haryana Assembly session nung bill benoktsü

New Delhi, February 21 (Agencies) : Jat nungeri parnok nem shilem mekazüka yujang ta takhangba agüja lungkak aitba nung nisung 12 tashi taküm samaogo aser iba onük asoshi Deobarnü Haryana sorkari taruba Assembly session nung OBC jenjang agütsütsü atema bill benoktsü telemtetba agi.
“Tanü Union Home Minister Rajnath Singh, Jat tanishirtem aser tanga union minister tem den senden ka amen. Iba mapang taruba Haryana Assembly session nung Jat nunger nem OBC jenjang agütsütsü atema Bill benoktsü lemtet” ta BJP nungi Haryana in-charge Anil Jain-i osangbener dang metetdaktsü.
Deobarnü kanga dang temaba jenjang nung amenba senden nung Home Minister Rajnath Singh, Defence Minister Manohar Parrikar, External Affairs Minister Sushma Swaraj, Road Transport Minister Nitin Gadkari aser Union Minister Sanjeev Baliyan nungertem aden.
“Onoki Haryana indang tensa kanga junga metetpelaogo. Taruba Assembly session nung Haryana nung Jat nunger nem shilem mekazüka yutsütsü telemtetba agi” ta Baliyan-isa metetdaktsü.
Union Home Minister den senden amenba sülen Jat Sangharsh Samiti tanishir Jaipal Singh Sangwan-i Haryana nung Jat nunger dang lungkak aitba anentsü mepishia metetdaktsü.
“Jat nunger tanishirtem dang Special Backward Classes telemsa kübok parnok nem shilem mekazüka yutsütsü ta nangzükogo” ta Haryana agriculture minister OP Dhankar-ia osangbener dang ashi.
Ano, Jat nungeri central government mapatem nunga shilem mekazüka yutsütsü takhangba reprangshimtsü atema Union Minister Venkaiah Naidu lenisüba kübok luden ka shima mapa nungloktsü.
Jat nungertemi lungkak aitba sentong tenzüker tatalokba balala nung nisung 12 süogo aser 150 shi yirua anepaludar.
Tanüa Haryana kübok tesem balala nung Jat nungertemi ozüng alema mapa inyakba osang angazüker aser Bhiwani district nungbo parnoki ATM ka aser cooperative bank ka nung mi senoktsü. Item tesemtem nung Army-i flag march agiogo.
Tesem aika nung ozüng alema mapa inyakba atema Haryana state sorkari Central Reserve Police Force aser Army nübo talila meshisemogo.
“Tensa kanga mejungi lir. Kaithal yimti nung curfew alitsü ozüng agütsüogo. Deobarnüa nisung ka süogo, tasür ajak agi 12 jungogo” ta Haryana Additional Chief Secretary, Home, PK Das-i metetdaktsü.
Haryana nung aser temeket aliba state tem – Delhi, Punjab, Himachal Pradesh, Jammu and Kashmir, Rajasthan aser Chandigarh leni aoba lenmang aser train lenmang aika nung timtem aliba ajanga mesenzüteter.
Talisa, Jat nungeri lungkak aitba ajanga Delhi-i tzü tajemtsü abenba noklang nung shilem 60 shi timtem ajurur aser iba khuret atema Honibarnü Delhi sorkari Supreme Court dang nungi teyari meshitsüsa aküm.
Centre sorkar-i Haryana nungi Munak Canal ajanga tzü mesür aruba nung timtem aliba ketdangsüa reprangang ta tetuyuba agütsütsü atema Delhi sorkari Supreme Court dang mepishi.
Delhi Water Minister Kapil Mishra-i ashiba agi, Jat lungkak aitertemi Munak canal gates raksatsü aser iba jagi Delhi-i tzü peria marur.
Delhi Chief Minister Arvind Kejriwal-ia tanü Delhi nung tzü mali ta metetdaktsü aser pai Haryana sorkar den Munak canal nungi tzü maneni abentsü atema jembidar ta shisem.
Delhi nung tzü peria maliba khuret atema Delhi sorkari Hombarnü nija aser sorkar school ajak shibangtsü tetuyuba agütsüogo.
Ano külen, Centre-ia Haryana sorkar dang Jat nungeri lungkak aitba ajanga Delhi-i tzü abenba inyakyim nung timtem tatokdaktsü ta tetuyuba agütsüogo.