Jats-i Delhi-i aoba lenmangtem mokdangtsü

New Delhi, March 02 (Agencies): Brihostibarnü Haryana Jat lenirtemi, parnoki akhangbatem mataloktsüra parnoki March 20, 2017 nü Delhi-i aoba lenmangtem mokdangtsü aser mamatzü densema nüngdakba osettsüset ajak nokdangtsü, ta amokmerenogo.
Jat nunger longkak aitertem jagi sorkar mapa aser shisaliok rejutem nung parnok nem menden wazüka yutsütsü akhanger, aser parnoki akhangbatemji mataloktsüra Holi benjung sülen parnoki longkak tesashiba aitstü, ta amokmeren.
All India Jat Aarakshan Sangharsh Samiti (AIJASS) Tir, Yashpal Malik-i, March 20, 2017 nü Jat nunger million 5-i tractors aser kisetshiruru anir Delhi-i oa longkak aittsü, ta metetdaktsü.
“Onoki tzü aser light bills magütsütsü. Longkak aitba temaitsü onoki anogo ka nija nüburtem nem mamatzü magütsütsü. Onoki sorkar plants aser agency tem nem mamatzü agutsüba anenogo. Onoki Haryana nung ‘non-cooperative movement’ tenzükogo,” ta Malik-i metetdaktsü.
Jat nungertemi kobi melii north India ajungalen longkak aittsü, ta metetdakja Jat lenir Malik-i, “Onoki nükjidong ka yur Delhi-i aru aser onoki Parliament tashi yimdong süa jajatsü,” ta shisem.
Brihostibarnüa Jat nunger longkak aiter nisung 5,000 shi Jantar Mantar nung adenshia longkak aitogo.
Centre sorkar mapa nung menden wazüka yutsütsü akhangba dak alia parnoki Jats ya OBC (Other Backward Class) küboki aittsü akhanger.
Central Delhi nung tanü Uttar Pradesh, Haryana, Uttarakhand, Delhi aser Punjab nungi Jat nungertemi longkak aita liasü. Iba sülen Jat lenirtemi linük Tir, Pranab Mukherjee nem temepishiba shidi ka agutsü.
“Onoki onük tenet nung takhangbatem agutsür aser sorkari itemji ataloktsütsüla. Sorkar mapa aser shisaliok rejutem nung onoki menden wazüka yutsüdaktsüner. Ozü nübur anema benoka aliba ken otem Haryana sorkari tangsa agientsüla,” ta lenirtemisa metetdaktsü.
“Tamalen longkak aitdang yirurtem nem senotsü teyari agutsütsüla aser longkak aitdang asürtem kibong nungi züngsem ka nembosa sorkar mapa agutsütsüla,” ta Malik-i ashi.
Yaküm Haryana nung Jat nungertemi longkak aitdang dokan, gari aser kiojen aika rongtoktsü aser nisunga aika asü.