JATTT mission exposure Sikkim-i or aru

Dimapur, March 15 (TYO) : Japukong Arogotem Toklang Tenzüker Telongjem (JATTT) nung ketdangpurtemi achaayanga Pastor aser Associate Pastor Women-tem Mission Exposure Sikim-i March 7-12 ,2016 or aruogo.
Iba sentong takok angutsüsa Tsüngremi mapang tesütep aser tenüngdaktsü ajak moatsü nung Tsüngrem tenüng asanger ta JATTT Mendenbuba Wb. T. Wabang aser Tezülur Wb. Jangjilong nati sangdong ka nung metetdaktsü.
“Dr. M.A.Wati Lusang, Japu; Imnatuba Longjemdang; Tekatoshi Longjemdang; Imtinuchet Longjemdang; Er. Narola Lakhuni; Walter Nokpu; Lanumar Nokpu; Er. Kima Nokpu; Er. Alang Aonokpu; Moameren Aonokpu; Lipok Aonokpu; Rongseniken Aonokpu; Chubatoshi Aonokpu; Amos Lirmen; Merentuba Lirmen; Bendangmeren Lirmen; Dr. Benjong Yajang; T.Ao (IAS) Yajang; Wapang (ADC) Yajang; Z. Temsü Yajang; Lima Lkr Longsa; Imkongmar Lirmen; Along Longtho; aser Imtichujang Aonokpu; parnoki rongsen nung tim metemdaktsüi yariba asoshia tepelaba tulu metetdaktsür” ta JATTT sangdong nung shia lir.
Iba sentong nung taoertemji arogo 15 nungi tebur 13 aser tetsür 10 liasü. Arogotem pei tenzükertem nübu melaba den rongsen agi yari asoshi tepelaba tulu metetdaktsür.
Meta balala semdanga senzüdang, Rev. Mar Pastor, Lirmen-i tenzükertem temeimtep aser teputep nung yaritepa tenzüktsü tayongzükba agütsü. Rev. Y. Alem Pastor Alongtaki ajanga Japukongji ajaklen mezüngpur rongnung dena lir anungji mezüngpur ka ama tanela nung asentenshia tenzüktsüla ta tayongzükba agütsü. Rev. Ayu Pastor, Japu pai Nehemiah lenisüba taküm den atishia tanü tenzüker shiaji Nehemiah jakla ama taremzük aser tenendak agi asen Tsüngrem tenzüktsüla ta ayongzükba den Nehemiah lenisüba dak rangloker Nehemiah Kaket azüngtsü tetuyuba (outline) kaket (leaflet) küma yanglur ajak nem agüja liasü. Iba sentong ajanga taortem ajak kanga temoatsü nguogo, ta JATTT sangdong nungsa metetdaktsü.