Jay Prakash Majumdar TMC nung denogo

New Delhi, Metsüremi/March 8 (Agencies): BJP lenir tejen Jay Prakash Majumdar, shiba taküm January ita mintoka liasü, pa Trinamool Congress nung denogo. Pa Mongolbarnü party tir Mamata Banerjee matsüngdang Kolkata nung bendanga agüja liasü.

Party nung adenba sülen mapang tatsüka dang lir, pa TMC indang state committee nung züngoksemogo. Majumdar party nung adenba sentong nung education minister Partha Chatterjee aser Kolkata mayor Firhad Hakim na densema party nung tanga tongtibang lenirtem aikati shilem agia liasü. Majumdar party nung officially maniok tsüngda International Women’s Day nüngtem nung sentong ka ayongzüka agiba mapang Banerjee-i o jembia liasü.

BJP-i, Majumdar den party lenir Ritesh Tiwari na party nungi mintok. Tenati BJP anema jembiba atema show-cause shiti agütsüba sülen party nungi mintoka liasü. Tenaprongla ya BJP indang state vice-president liasü.

“Party inyakyim anema inyakba atema aitsür aliba bushisüngdang mesüzük tashi Majumdar aser Tiwari na khen atema party nungi mintoka atar,” ta state BJP tir Sukanta Majumdar tetuyuba nung zülur agütsüba shiti nung shia lir.

2021 TMC-i Assembly election akokba sülen taoba Union minister Babul Supriyo densema BJP lenirtem aika TMC nung denogo. TMC toktsür aoba lenir Mukul, Sabyasachi Dutta aser Rajib Banerjee nungera party-i tanaben meyipa aruogo. Parnok timba Assembly election matong tsüngda BJP nung dena liasü.