Jayalalithaa asüba ken o nung Sasikala den Apollo Hospital chairman jaoker

Chennai (Tamil Nadu), December 22 (Agencies): Taoba Tamil Nadu Chief Minister, J Jayalalitha asüba kuli bushisüngdangtsü atema state sorkari tentetba, inquiry commission-i Hokolbarnü iba ken o nung VK Sasikala aser Apollo Hospital chairman, Pratap Reddy na jaokogo, ta tanü osang ka ajanga ashi.
Taoba mapang Madras High Court judge, A. Arumughaswamy leniba nung iba Commission-i Jayalalithaa asüba kuli bushisüngdanger.
December 20, 2017 nü Commission-i TTV Dhinakaran den külemi inyaksemer, P Vetrivel anema ken o ka benoka liasü. RK Nagar by election agitsü anogo ka lia pai Jayalalithaa indang video ka prok. Iba video nungji Jayalalithaa hospital ka nung amongba noksa lir, aser iba noksaji ajanga yimtenren nung mepetmesü tulu adok.
Iba dak sendakba nung tang tashi nungbo Apollo Hospital-i telangzüba kecha agüja mali.
Second 20 shi video nungji AIADMK tongti, Jayalalithaa aonung sobutsü ka semer tajemtzü ka luli agi ajemba noksa lir. Iba video ji AIADMK MLA nungi anentsüsang, Vetrivel-i prok.
Asür Jayalalithaa ya yaküm September 26 nü Apollo Hospital-i anir ao, aser ita asem shi amongba sülen December 5, 2016 nü asü.
Nisung aikati la hospital-i anir aodangyongi sür liasü, ajisüaka yimtenren nung tajangzük angutsü atema mimshia ayu ta melung melemi bilemer. Ajisüaka Apollo hospital-ibo, la September 22 nü hospital-i anir arudang la süchia orr liasü, ta ashir.