Jayalalithaa-i centre dang tzümetsüng agi timtemer asoshi sen crore 10, 250 meshir

Chennai, December 13 (Agencies): Tamil Nadu Chief Minister J Jayalalithaa-i linük sorkar dang state nung tzümetsüng agi kongshir timtema alirtem yaritsü asoshi sen crore 10,250 agüjang, ta temepishiba ka agütsüogo.
Minister of Urban Development, Housing and Urban Poverty Alleviation M Venkaiah Naidu-i Jayalalithaa den state secretariat nung ajurutepa liasü.
Tena ajurutepdang tzümetsüng agi kanga mejungi kongshia aliba tesem tang Naidu’er ministry ajanga teyari tagütsüdak aliba tesem kar tuteta jembia liasü, ta sorkar sangdong ka ajanga ashi.
Jayalalithaa-i, tzükümlen aliba kibong 50,000 shi iba tzümetsüng agi kongshiogo anungji parnok asoshi talidak tesem balaka yanglutsütsü nüngdak aser ibaji atema sen crore 5,000 shi nüngdaktsü, ta Naidu dang ashi.
Ano tzünglu tesashi agi Chennai Metropolitan tesem nung aliba slum tem nung alirtem ki samatsüba ajanga parnok nem ki 50,000 yanglutsütsü atema sen crore 750 nüngdaker ta ashi. State nung lenmang, tzü tajemtsü aser jana aoba lenmang tem asosgi sen crore 4,500 agüjang, ta Jayalalithaa-i urban development ministry dang shiogo. Lai, tzümetsüng agi kongshir alir nem sen crore 8, 481 aser tang rongdak asoshi sen crore 2,000 agüjang, ta Nov. 23 nü centre dangi temepishiba ka yokogo.