Jayalalithaa-i Modi den NEET & Jallikattu onük benok

New Delhi, June 14 (Agencies): Tamil Nadu Chief Minister, J Jayalalithaa-i India Ato Kilonser, Narendra Modi den tanü, Mongulbar nü ajurutepa, Cauvery Management Board tentettsü aser Tamil Nadu-i ajurushia aliba NEET den sentakba khuret bentettsütsü takhangba benokogo.
Tamil Nadu lenisütsü menden tan agi tanabenren abentsü temeten anguba sülen Modi den tan mezüngsüa ajurutepdang Jayalalithaa-i Mullaperiyar dam nung tzü feet 152 tonga timba kümdaktsütsü onük densema, kaket tapak 29 densemba takhangbatem benoka liasü.
Lai tan benokba takhangbatem nung ayongtem ajurutepdaktsütsü, Katchatheevu asetkong wazüka ayutsü aser Scheduled Tribes tarensen nung angopurtem densemdaktsütsü takhangbatema benokba osang angazükogo.
Ano, GST mapatong mapa küma inyakdaktsütsü aser Kundankulam nuclear power plant indang tanabuba unit mapang tekaratiba nung tenzüktsütsü asoshi Jayalalithaa-i ajungshiba osang jangjaogo.
Tamil Nadu state nung All India Institute of Medical Science (AIIMS) tentettsütsü aser Sri Lanka nunger Tamil nisungtem den sentakba mangatettepbaren bentettsütsü, Jallikattu anema benokba tenokdangbatem agientsü aser Tamil state oshi kümdaktsütsü takhangbatema Tamil Nadu Chief Minister-lai benoka liasü.