Jayalalithaa-i party manifesto sayaogo, phone angati agütsütsü

Mayilvaganan (Tamil Nadu), May 05 (Agencies): Tamil Nadu nung May 16, 2016 nü assembly election agitsü lia Brihostibarnü state Chief minister aser AIADMK general secretary, J Jayalalithaa-i lar party manifesto sayadang lai, tetsürtem scooter alitsü atema subsidy shilem 50 agütsütsü aser ration card alir ajak nem mobile phone angati agütsütsü, ta metetdaktsü.
Kibong shia nem light power unit noklang kaka angati agütsütsü ta shia lai, “Light power unit 100 dang agir nisung lakh 78 atema light bill khuret malitsü,”  ta ashi.
AIADMK election manifesto nung tenangzükbatem rongnung- teintet rogotem bus nung angati senzütsü, tenla ki aser mosques yanglushitsü atema senotsü teyari agütsütsü, Set top box angati agütsütsü, bus stand complex aser park tem nung WiFi angati agütsütsü, kibong akumer nem hon touzük gram 4 agüja aliba nungi gram 8 tashi agütsütsü aser Vitamin A, D den iron tablets angati agütsütsü.
Lar sorkar tashii arura school tanurtem nem anüngdang chiyungtsü agütsüba dang masü saka anepdanga chiyungtsü agütsütsü, Lokayukta tentettsü, maternity assistance leave ita 9 tashi agütsütsü, Amma banking card agütsütsü, angopurtem nem Housing scheme, Class 11 aser 12 kaketshirtem nem maneni laptops angati aser internet connection angati sütsütsü, Amma kit den sanitary napkins angati agütsütsü aser district ajak nung temang angati tendangtsütsü.