Jayalalithaa shirang anepogo: Apollo Hospitals

Chennai, November 04 (Agencies): Tamil Nadu Chief minister, Jayalalithaa shirang anepogo, ta Hokolbarnü Apollo Hospitals mendenbuba, Dr Prathap C Reddy-i metetdaktsü.
Osangbenertem den jembidang Reddy-i, “Tangbo lai (Jayalalithaa) la anasa inyakbatem meteter. Lai la nüngdakbatem asüngdanger aser meshir. La junga lir ta onoki tepela nung metetdaktsür,” ta ashi.
Tasüngdangba ka langzüdang pai, “Kidangi kodang meyipa aotsü, ibaji telemtetbaji lai agitsü. Tongtibangtiba treatment tembangogo aser kanga takok ngua agiogo,” ta ashi.
“Iba ya doctor tem ajanga dang masü, saka nurse tema dena lir. Ibaji ajaki longjemer inyakba ajanga lir. Onoki alima nung tajungtiba treatment ji la nem agütsüogo,” ta Dr Reddy-isa metetdaktsü.
Jayalalithaa ya temang metaba den külemi dehydration timtem adoka September 22 nü hospital-i anir oa liasü. Tesülen la nem respiratory support agütsü aser infection den tepokpok timtem atema la nem antibiotics agütsü. La nem passive physiotherapy-a agüja liasü.
UK aser All India Institute of Medical Sciences, New Delhi nungi doctor telok kati densema Apollo Hospitals nung la yaria liasü.