JCC-i Dimapur nung tenokdangba tera salatsür

Dimapur, February 4 (TYO): Joint Coordination Committee (JCC)-i tang Dimapur mokdanga aliba nung inyakyim kar salatsüogo aser item rongnung February 6, 2017 nungi bank ajak lapoktsü temelaba agütsüba dena lir.
JCC-isa Dimapur Municipal Council nung sanitation workers dang anogoshia anepdang 9:00 ako tashi nungbo merükmeju mapa tembanga inyaktsü tetuyuba agütsüogo.
Ajisüaka, Nagaland state sorkar indang office tem, ketdangsertem aser garitem maneni mokdangtsü, ta JCC-i nenshia metetdaktsü.
Sorkar dang tejashi sayua Deobar nungi tenzüka jila nung shishilembadak ajak nung wako tanak ayutsü mepishir, ta JCC-isa metetdaktsüogo.
ULB elections tazüngla kümdaktsüba dak sendakba nung State sorkari ‘official notification’ agütsütsüla aser taoba Commissioner of Police, Dimapur mapa nungi anentsüba ama Superintendent of Police, Longleng-a mapa nungi anentsütsüla, ta JCC-isa takhangba agütsü.
“Nagaland nung tang aliba sorkar ya democracy den meputep lir, anungji Chief Minister-i iba tebilemtsü khuret bena pa menden toktsütsüla” ta JCC-isa ashi.
MLA 42-i pa pusema nungiter ta Chief Minister-i sangdongba atema JCC-isa ashiba agi, “TR Zeliang ji par MLA tem atema Chief Minister masü, saka paji nübor ajak atema Chief Minister lir.”
Ano külen, Dimapur Naga Youth Front-ia NST bus service senzütsü temelaba agütsür, ta metetdaktsüogo.