JCC-i mapang tatakzük makai mokdangtsü

Dimapur, January 29 (TYO) : February 1, 2017 nü state Urban Local Bodies (ULB) elections agitsü lemtetba anema Joint Coordination Committee (JCC)-i January 30 anepdang 7:00 ako nungi mapang tatakzük melii state ajunga mokdangtsü ta metetdaktsüogo.
Deobar nikongtsütsü JCC-i osangbener senden ka nung jembidang ashiba agi, mokdangba sentongji February 1 tashi alitsü aser parnokisa candidate tem dang nübortemi ola adokba akümtsübutsü mepishia metetdaktsü.
State sorkari telemtetba agia aliba meyipa reprangshitsü aser ULB elections thinentsü atema mepishir. Mokdangba mapang lendong-tsüdong kar danga atalokra, iba tebilemtsüji sorkar aser candidate temi abentsü, ta JCC-isa ashi.
JCC-isa volunteer tem dang mokdangba mapang pei nem lemzüktsüba mapa inyakdang timi inyaksangshitsü atema tetuyuba agütsü.
Mokdangba mapang District administration, police, para military, Media, hospitals, medical emergency, kiyimba/ asüpila sentongtem aser tatidang agütsür kaketshirtembo tenokdangba kübok maiter. Maneni anepdang 7:00 ako matongdang osangkaket alemertemi osangkaket alemtsü JCC-isa metetdaktsüogo.
JCC-isa municipal elections thinentsü atema tatembangba takhangba agütsütsü atema Dimapur nung aliba senso ajak January 31 anepdang 9:00 ako nung Deputy Commissioner office nung adenshitsü mepishia metetdaktsür. Iba dak sendakba nung kin Hoho temi pei pei züngsemtem dang mapang shitak nung senteptsü osang sangdongtsü mepishir ta JCC-isa shisem.
Naga nunger taginüba anema election maparen inyaker anungji GBs, Village/ Colony Council temi pei pei telongtet nung iba dak sendakba mapa meinyakdaktsütsü metetdaktsür, ta JCC-i ashi aser parnokisa polling ketdangsertem dang election maparen nung shilem magitsü ayongzük.
January 29 nü ghonda 12 takok ngua mokdangba nung volunteer aser kin telok ajaki pei nem lemzüktsüba mapa takok ngua inyakba atema JCC-isa tenüngsang agütsü.
DMC Ward 20 nungi independent candidate kati Naga nungeri aginüba akhümtsübua election nungi ‘retire’ süogo, ta JCC-isa osangbenertem dang ashi.