JCC-i state sorkar dang nenshia metetdaktsür

Dimapur, October 29 (TYO): October 29, 2017 nü Joint Coordination Committee (JCC) senden ka amendang March 18, 2017 nü Nagaland Chief Minister nem tezüluba ka agütsüba dak sendakba onük benoka olemtep.
JCC-i züluba shidi nung Nagaland Legislative Assembly taoba Assembly Session nung iba onük benoktsü aser November 24, 2016 nü ULB election agitsü telemtetba meyipa agitsü atema bill ka benoktsü mepishia liasü, ta JCC Media Cell sangdong ka nung metetdaktsü.
Iba onük ya kanga dang tongtipang aser Nagaland nung alirtem teimbaka ajangzüktsü atema lir saka taoba Assembly Session nung iba onük benoka mejembi. Anungji, JCC-i maneni state sorkar dang iba onük ya tongtipang ta agizüka mapa inyaktsü aser November 24, 2016 nü cabinet telemtetba meyipa agitsü mepishia metetdaktsür, ta Media Cell sangdong nungsa shia lir.
Tang aliba state sorkari tangatetba tajung aser shisatsü agi nenok nem agüja aliba tashi amshia nübortem indang temeden kümzüka ayutsü imlar, ta parnokisa shisem.
Maneni, August 21, 2017 nü Nagaland State Cabinet-i Tribal Hohos aser sendaktepa alirtem den asüngdangyaba sülen Nagaland Municipal Act, 2002 indang Review Committee ka tentetba asoshi pelar. Iba ludeni mapa inyaka arudar aser ita asem tsüngda osang agütsütsü, ta JCC-isa metetdaktsü.