JCC-i T.R.Zeliang C.M akümba magizüker

Dimapur, July 26 (TYO) : Taküm küm tetenzüklen Nagaland government-i ULB election agitsü merangba ajanga Nagaland tesem aika nung asüama aser lendongtsüdong tulu atalokba indang bushisüngdang metenzükdangyongi, ano T.R. Zeliang chief minister akümbaji Naga nunger mezüngmeshir asütsü, anungji magizüker ta tanü Joint Co-ordination Committee ajanga metetdaktsüogo.
Iba ken o ya tanü Dimapur nung Naga kintem adenshia JCC purtem den senden ka amendang lemtet.
Iba kasa senden nungsa, tang Nagaland Legislative Assembly nung amenertemi parnok shimer nübortem nüngdak aser timtem mereprangi pei kija ajangzüktsü dang bushia inyakba mapa aser jakla anema taitsüba ken o sashisashia ka metetdaktsüogo.
JCC senden ajangasa state government dang Nagaland Municipal Act dak sendakba nung 2016 küm November 24 nü tatar senden nung latetba akaba ken o ji ita ana mesüidangsa agienadoktsüla ta metetdaktsüogo.
Kasa senden nungsa JCC ajanga state government dang nübortem taginüba anema ULB election agitsü merangba ajanga asüama aser lendong atalokba mapatem indang bushisüngdangba osang ita ana tsüngda agütsütsüla ta metetdaktsüogo.
Tanü kasa senden nungsa ULB election anema nokdakba mapang tentetba Dimapur Naga Youth Front (DNYF), koba azü agi alangzükogo, iba dak alaka tang tanga DNYF telok tasen metenzükdaktsütsü telemtetba agiogo.