JCC-i T.R.Zeliangi jembiba aitsür

Dimapur, March 04 (TYO) : T.R.Zeliangi pa chief minister menden nungi aludaktsübaji kin tila pur asüba agi ta jembia senzübaji nübortem timatemba aser pai telemtetba shitak magitetba ajanga Dimapur nung lanur ana taküm samaba mapatem indang kecha hau ta sasaa mebilemi Naga nunger mezüngmeshia jembiba mapa ka asütsü ta tanü sangdong ka ajanga Joint Co-Ordination Committee-i metetdaktsüogo.
Nagaland nung T.R.Zeliang leniba kübok nübortem anema ULB election agitsü merangba ajanga tesem aika nung asüama aser lendongtsüdong atalokba indang shitak bushisüngdangtsü atema nisung asemi akümba Enquiry Committee ka shimtsü asoshi takangba agüja lir aser ibaji matalok tashi maneni nübortem asoshi raratsü ta JCC-isa metetdaktsü.
Ano, March 3, 2017 nü Dimapur nung JCC senden alidang lemtetba rongnung ka meshisembaji Longleng DC aser kecha tebilemdang melii nisung dak akhaba police-tem mapa nungi anentsütsüla ta lemtetba liasü aser tang nungi anogo tenet tsüngda parnok ajakji anentsütsüla ta JCC-isa government nem takangba ka metetdaktsüogo.