JCC-i TR Zeliang onük meyiptsür; Neiphiu Rio dang kümdangtsü tuyur

Dimapur, February 14 (TYO) : Chief Minister, T.R Zeliang-i consultative meeting 14 lir külen ULB election agitsü lemtet ta ashibaji maneni public külakoktsütsü atema inyakba mapa ka lir, ta Media Cell, Joint Coordination Committee (JCC)-i sangdong ka nung metetdaktsüogo.
Senden 14 ben amen nunga ajaki haihaura ta asüba telemtetba ka magiteti tembang saka sorkari nübortem nungi temelaba magii ULB election agitsü lemtet. Chief minister-i radio ajanga jembiba nung tagitsü kecha mali aser Prime Minister-i inyakba mapa ajizüka inyakba ka dang lir, ta JCC-isa ashi.
Maneni, tang ULB onük atema mangatettep aliba tensa ka nung MP, Neiphiu Rio-i pa kecha tai mali ama aser tekümzüker ka ama jilu mebenshitsü metetdaktsür, kechiyong 2001 küm yangluba Nagaland Municipal ACT ji pai yangluba lir. Anungji, pai tang tensa nung pa yimtenren tsütsü jenjang yanglushitsü atema mapa meinyaktsüla aser Naga nungertem suwar masü, ta JCC-isa metetdaktsüogo.
Neiphiu Rio-i interlocutor R.N Ravi aser National security advisor Ajit Doval dang tang NTAC aser JCC nati inyakba mapa ajanga yimjung olemtep nung tetsükdaktsü ajurutsü ta ashiba aitsür. Iba amai jembiba ajanga pai Naga nunger public atema mebilemtsüba sayur. Chief Minister T.R. Zeliang anema nokdakba nisungtemji Indo-Naga yimjung olemtep nung densema mali ta nisung ajaki kanga junga meteta lir, ta JCC-isa metetdaktsüogo.
Zeliangrong People’s Organization (ZPO)-i sangdong ka nung Chief Minister ji ‘backward tribe’ ka nungi asüba agi Nagaland nung alirtemi pa anema nokdaker ta ashibaji kanga dang shisamakai jembiba lir. Chief Minister ji Zeliangrong Chief Minister masü saka Naga nunger ajak atema minister lir, taji pa Naga nunger ajak tsüngdang langzütsü ta nenshia metetdaktsür. Anungji, ZPO-i telemsa adokdaktsütsü atema mapa teinyak ta shisalen agütsür, ta JCC-isa metetdaktsü.
Chief Minister T.R. Zeliang-i tebilemtsü khuret bena menden nungi malu tashi onoki lungkak aittsü. Train lendong ka atalokba nung Union Minister for Railways bo dena maliasü sürnung pai/lai tebilemtsü khuret bena mapa nungi anener aser iba amaji alima tesem balala nung lennirtemi inyaker, ta parnokisa ashi.
T.R Zeliang-i JCC, State sorkar aser NBCC tsüngda tenangzüktep agiba raksaba ajanga nisung asem tashi taküm sama aser aika yirutsü. Iba ajanga state sorkar ketdangsüa moutettsüsa tensa ka ajuru, anungji pai item tebilemtsü khuret agia, tensa tajungba kümdaktsütsü asoshi pa menden toktsütsüla. T.R Zeliang-i Chief Minister menden koma’ar ka meim yonga, Naga nunger public-i pa nem iba menden nung memendaktsütsü, ta JCC-isa akangakanga metetdaktsü.
Nagaland nung tensa mazüoktettsüsa tia ka nung lir, anungji Angh-i pa teinyaktsü mapa inyaktsüla ta JCC-i metetdaktsür. Tensa tamajungba küma ora, iba tebilemtsüji Angh aser Chief Minister nati abentsü, ta parnokisa ashi.
Tanü asenoki ajurua aliba tensa nung Nagaland nung alirtem tesüiba meyipa reprangshitsü ayongzüker. Election mapang asenoki asen vote ayokba aser lennirtem shimba ajanga tanübo asen vote ayokba lennirtemi nübortem ola mangashir mesüra hau ta mali yutsür, ta Media Cell, Joint Coordination Committee (JCC) sangdong nungsa ayongzük.