JCC-i ULB election thinentsü akanger; January 27 nü nungi Nagaland ajunga mokdangtsü

January 23, 2017 nü State Stadium, Dimapur nung Dimapur Naga Council kübok Joint Coordination Committee (JCC)-i ayongzükba lokti senden nung nübortemi Municipal aser Town council election magidaktsütsü ta teka mekanga telemtetba agiba noksa nung angur. 

Dimapur, January 23 (TYO) : Nagaland government-i Municipal aser town council election 1st February nung agitsü lateta aliba ya methitemra, January 27, 2017 nü nungibo Nagaland ajaklen anogo aser mapang tataktet maka mokdangba sentong ayongzüktsü ta tanü Dimapur nung Naga Council kübok Joint Coordination Committee (JCC)-i ayongzükba sentong nung nisung meyirijang aika adenshia telemtetba agiogo.
Tanü yangi iba sentong nung ENPO, Ao Senden, Lotha Hoho Dimapur, Western Sumi Hoho, Chakhesang Public Organisation aser Angami Public Organisation nungi lenirtemi jembidang Nagaland Municipal Act ya meyipa reprangshir memelenshi tashi Nagaland nung Urban Local Bodies elections ya magidaktsütsü ta metetdaktsü.
Parnokisa ashiba agi, tang lateta akaba Municipal Act nung ajemdaker election agiba ajanga India temzüng arla 371 (A) nung Naga nunger sobaliba aser temzüng ozüng shitak amshia aotsü temeten latetja aliba alema inyaker asütsü. “Yimten tashi küm pongo asoshi bushidang, Naga nungertemi pei yimten aser sobaliba temeten mesamadaktsütsüla,” ta tanü lokti senden nung o jembirtemisa metetdaktsü.
Democracy nung kiburji nübortem lir, anungji government nung yimsüsürtemi ibaji angatettsüla aser nübortem ola angatsüla ta parnokisa ashi.
Iba senden nung Dimapur Municipal Council election nung aitsü tenüng agütsür lia nübortemi mepishiba ajanga pei tenüng meyipa agir nisungtem rongnungi nisung asem Wb. Imotemjen, Wt. Tiala Sapu aser Ekhato nungertemia Naga nunger temeten wazüka ayutsübajiang tongtibangba ta angatetba agi election nung tokteptsü tenüng agüja aliba nungi agien ta metetdaktsü.
Iba lokti senden temer külen JCC-i Chief minister nem Deputy Commissioner, Dimapur ajanga ULB election thitema atatsüla ta takangba agütsüba shidi ka agütsü. ” Naga nungertemi pei sobaliba temzüng ozüng, temeten aser ali dak aketba rongsen kümzüka ayutsü asoshi tatem tashi nokdaktsü, anungji state governmenti tashiyim agi nübortem tangatetba anema election agitsü memerangtsüla,” ta JCC -isa metetdaktsü.
Nagaland government-i January 26, 2017 tashi nung ULB election methitemra, January 27 nungibo anogo mapang tataktet maka mokdangtsü aser iba mapang langka majung danga atalokra, government khuret asütsü ta parnokisa metetdaktsü.
JCC-i Naga tsürtem yimten nung shilem magidaktsünüba kecha mali saka tang lateta akaba municipal act yabo khen jungjunga reprangshitsü nüngdaker ta parnokisa ashi.
Tseminyu nung ULB election magidaktsütsü :
Tanü Hombar nü Tseminyu town nung Rengma Hoho-i political party balala nung lenirtem aser election nung aitsü pur candidate-tem den telongjem senden ka alidang, tang agitsü aliba ULB election yagi Naga nungertem atema telongjem raksatsüba mapa amato ka kümogo, anungji 1st February nung agitsü aliba ULB election ya Tseminu nungbo magidaktsütsü, anungji candidate-tema ajak election nung tokteptsü aliba maparen nungi anenang ta metetdaktsü.
Parnokisa state government dang election sentong ya thitema yur, nüngdakba nisungtem jaoka shisalemsateptsüla ta takangba ka agütsüogo