JCC/ NTAC lenirtemi CM ajurua takhangba agütsü

Kohima, March 09 (TYO) : Brehostibar anepdang Kohima nung Nagaland Tribes Action Committee (NTAC) aser Joint Co-Ordination Committee tenüng nung parnok lenir pezüi chief minister, Dr. Shurhozelie Liezietsu ajurua Nagaland Municipal Act, 2001 reprangshia yanglushitsü atema takhangba agütsüogo.
NTAC & JCC purtem rongnung NATC Co-Convenor, Neivor Rutsa aser JCC Co-convenor Vekhosayi Nyekha nati anir chief minister ajurua tezüluba nung Municipal Act yanglushitsü asoshi jembidang, chief minister-i parnok dang asenok ajaki asen nübortem asoshi tajung dang bilema inyaker, ajisüaka kari danga langka tai inyaka lira, itemji temulung lapoka jembiteper tangatettep kati arutsü merangtsüla, iba amaji asünung dang asenoki asen loktiliba asoshi mapa tajung tuluba inyaktettsü ta metetdaktsü.
” Tebilemtsü liaka asenok ajak longjemer mekoktettsübaji kecha kuli mali, anungji nisung ajaki aremzükteptsüla aser ken o benoka jembiteper tebilemtsütem akoktsü merangtsüla,” ta paisa ashi.
Government-i akok tashi nübortem asoshi kechi tajung aji inyaktsü, aji oda tawa state nung mepetmesü atalokba ajanga shinga majangzük aser majangzüktsü, ibayongji government-i kanga aremzükogo ta chief ministerisa metetdaktsü.
Paisa JCC aser NTAC lenirtem dang temulung nung tamajung mebilemi nübortem asoshi kechi tajung, aji jembitepa inyaktsü asoshi teti ajurua alitsü bilemdaktsüner ta metetdaktsü.
“Khenkhenbo politics ya tesempatsüka asütsüa akok aser ibaji ajanga karbo tajangzük angutsü dang bilema inyaktsüa akok, ajisüaka asenok tebilemtsüji asenoki dang akoktsü,” ta Dr Shurhozelie-isa metetdaktsü.
Tawa state government-i nübortemi mulungba anema ULB election agitsü merangba ajanga anogo aika alima mesüngjemteti lendong tsüdong atalokogo aser nisung taküm dena laluogo aser government asoshi takoksa aika ajuruogo ta tanü NTAC aser JCC teloki chief minister nem tezüluba nung municipal act yanglushitsü nüngdakba indang tezüluba nung agütsüba mapang metetdaktsü.
Tang lateta akaba Nagaland Municipal Act, 2001 yabo tangar dang nungi apua bener aruba amshiba ozüng ka dang lir, iba jagi asen loktiliba aser sobaliba dak mapeter, anungji Naga nunger dak apetba ozüng lateta inyaktsü asoshi kanga nüngdak kümogo, ta parnokisa metetdaktsü.
Iba ama tensa mapang ka ajurua, JCC aser NTAC purtemi February 7, 2017 nü APO Hall Kohima nung senden ka lia Nagaland Municipal Act, 2001 ya meyanglushi tashi Nagaland nung ULB election magidaktsütsü ta lemtet. NTAC aser JCC ya Naga nunger kin shia nungi lenirtem adenshia shimtetba telok lir ta parnokisa metetdaktsü. Iba kasa senden nung Naga nunger kin shia nungi lenirtemi Nagaland Municipal Act ya India temzüng arla 371 A nung Nagaland asoshi temeten balaka agija alibaji mapa küma amshitettsüsa asütsüla ta NTAC & JCC lenirtemisa metetdaktsü.
Ano, tan March 03, 2017 nü NTAC aser JCC senden ka Dimapur nung akadang, Nagaland tatar senden nung November 22, 2016 nü latetba pangzüjia agientsüla ta latetogo ta parnokisa chief minister nem metetdaktsüogo.
Iba mapa inyaktsü asoshi ita asem tsüngda temzüng ozüng nung mongin nisung dena Committee/ Law Commission ka tentetter mapa tenzükdaktsütsüla, iba amaji meinyaktet tashi Nagaland nung ULB election magiang tajungba asütsü ta NTAC aser JCC teloki metetdaktsü.