JCILPS aser Okram-i aniba sorkar na senden menogo

Imphal, August 10 (Agencies): Joint Committee on Inner Line Permit System (JCILPS) aser state sorkar na Hombar nü senden ka menogo aser iba senden ya state nung Inner Line Permit (ILP) amshitsü asoshi telemtetba ka agitsü nükjidong nung ayongba liasü.
“Hombar nikongdang 3:00 ako nungi tenzüka chief minister office nung iba senden akatsü asoshi state sorkari onok official süa jaokogo,” ta JCILPS nung convenor-in-charge Khomdram Ratan Deobar nü metetdakja liasü.
Deputy chief minister Gaikhangam-i ashiba agi, tanbo sorkari telemtetba tajung kabosa agütsütsü akok.
Ratan-i, state drafting committee-i ILP ken o atema draft yanglua aliba nung telatetba pongu alibaji mapa küma inyaktsü asoshi JCILPS-i akhangtsü, ta ashi.
Law minister Th Debendra Singh-i aniba drafting committee-i sorkar nem draft bill ka renema agütsüogo aser ibaji August 15 nü nungi mapa küma amshi tenzüktsü tebilemba lir.
“Hombar nü senden nung süoka jembitsü asoshi telemtetba kar renemshitsü atema onok rongdak senden ka tama menmatsü,” ta Ratan-i ashi.
ILP shitak amshitsü akhangba ya July 8 nü Imphal nung iba ken o nung takhangba agüja lungkak aitba mapang police-i kaketshir Sapam Robinhood kahsetba sülen nungi balaka tashi ita apusotsü tenzük.
Iba tatalokba den sendakba nung police parnok trok mapa nungi anentsüogo.
Iba senden nung JCILPS lenir parnok 12 adentsü sentong lir.