JCPI-i Committee nem anogo 10 latettsür

Dimapur, January 19 (TYO): Abhishek Singh (IAS)-i aniba Committee on BEFR/ILP/Inclusion of Dimapur under ILP ajanga November, 2018 tashi nung state sorkar dang parnok tebilemba metetdaktsütsü atema mapang latetja liasü, anungji iba sangdong agütsüba sülen anogo 10 tsüngda state parnoki state sorkar/cabinet nem osang agütsütsü metetdaktsür, ta JCPI (Joint Committee on Prevention of Illegal Immigrants)-i tanü ashi.
JCPI-isa Committee-i bushitetba osangji parnok nema agüjang ta shiogo.
JCPI nung Nagaland civil society telok 20 dak tema dena lir aser tanü parnoki ashiba agi, Committee-i iba tetuyuba ama meinyakra ozüng alema arurtem ket nungi Nagaland state kümzüka ayutsü atema lungkak aittsü.
Arrla 371A, BEFR/ILP aser Village Council Act 1978 ajanga Citizenship Amendment Bill, 2016 nungi Nagaland kümzüka ayutsü ta Chief Minister Rio aser NDPP-i ashibaji tanuri jembiba olen mesüka lir aser yimten yimsüsür tejentemi iba amai angateta jembiba angudang kanga aoksar. Kechiyong tang college nung tezüngdak kaketshirtemia Arrla 371A/ILP/Village Council Act, 1978 aser Indian Constitution-i senso agütsüba tsüngda tesentaktep kecha mali ta angateta lir, ta JCPI-isa ashi.
CAB atema o atsütepba nung tangatetba shitak alir aser azüngtsü-zülutsü meteta alir shiangaia Arrla 371A/BEFR/ILP benoka mejembitsü, ta parnokisa shisem.
Manipur nung BJP CM den Meghalaya aser Mizoram CM temi Bill magizüker. Ajisüaka, Assam CM Sarbananda Sonowal-i Naga CM-ibo CAB anema menokdaktsü ta ashiba ajanga Northeast nunger tsüngdang Naga nunger tenüng menüktsüogo. Anungji, state sorkari CAB anema menokdakra, parnoki Naga nunger yoka chiogo ta nübortemi obendang agütsütsü, ta JCPI-isa ashi.
Nagaland nung kin hoho aser teloktemi nübortem temeten kümzüka ayutsü atema tebilemtsü bena mapa inyaktsüla. Iba dak sendakba nung JCPI-i tarutsü anogotem sentong mesüra teinyaktsütem indang osang metetdaktsütsü anungji iba nung nisung ajaki amalitepa yariteptsü mepishia atar. JCPI-i Northeast nung aliba lisopur ajak den külemi CAB anema noktaker, ta parnokisa shisem.