JCPI-i Nagaland GB Federation posema nungiter

Dimapur, February 6 (TYO): Nagaland GB Federation (NGBF)-i February 8, 2019 nü sentong ka agitsü ayongba nung Joint Committee on Prevention of Illegal Immigration (JCPI)-i posema nungiter.
Tang tagidak Rajya Sabha session nung CAB agizükra, India President-i iba asoshi telemtetba magii atang ta memorandum ka agütsütsü atema NGBF-i iba sentong ayonger. Iba sentong nung adenertemi February 8 anepdang 11:00 ako nung Old MLA Junction nungi Raj Bhavan tashi jajatsü.
Cabinet-i Rajya Sabha majangi CAB posema ozüng ka yanglura, President-i ibaji magizüktsüla NGBF-i memorandum agütsütsü.
Iba sentong nung adentsü atema Dimapur nung alir Angami, Ao, Sumi, Lotha aser Chakhesang kin shia nungi nübo 15 aser tanüngba kin shia nungi nübo 10 bosa yoktsü mepishir, ta JCPI-i ayongzük.
Senzüsenbongtsü anepalutsü atema Dimapur nung Naga Council kübok aliba kintemi February 7, 2019 matongdang Naga Council Office ket nung tenüngtem agütsütsü metetdaktsü.
Iba ama ratatepba mapang ka nung asen loktiliba anüker GB temi iba khuret agizükba aser talisa CAB o Naga yimten tebilemtsü khuret abenba atema tenüngsang agütsür, ta JCPI-isa metetdaktsü.