JCPI-i ozüng alema arurtem akangakanga noktangtsü akhanger

Dimapur, Luroi (August) 20 (TYO): August 18, 2018 nü Joint Committee on Prevention of Illegal Immigrants (JCPI)-i Chief Secretary nem tezüluba ka agütsü.
JCPI-isa Chief Secretary den külemi Home Commissioner, Special Secretary Home, o Director General of Police aser Addl DGP nunger den senden ka amen.
Senden amenba sülen Commissioner and Secretary to the Chief Minister Abhishek Singh lenisüba kübok luden ka tentet aser iba ludeni anogo 15 tsüngda ILP maparen akangshitsü aser ozüng alema arurtem azüoktsü atema comprehensive action plan ka agütsütsü mapang latettsü, ta Media Cell, JCPI-i ashi.
Assam nung tang inyakba NRC maparen inyakba mapang Nagaland state nung lisopurtem indang temetentem kümzüka ayutsü atema ludeni inyakyim ka latettsü, ta parnokisa ashi.
JCPI-i senden nungsa ILP monitoring cell aser Foreigners Tribunal tentettsü atema tayongzükba agütsü.
JCPI züngsemtemi luden dang RTAs aser district shia nung Municipal Councils/town committees semdangtsü aser ozüng alema arur nem Driving Licenses o Trade Licenses mashii agütsüba azüoktsü atema mepishi.
Dimapur nung Deputy Commissioner (DC) indang office ajanga masü saka Police Commissionerate Office ajanga ILP maparen inyakdangtsü atema JCPI-isa tebilemba lemsatep.
Nagaland nung non-indigenous nisungtem GBs inyakdaktsüba aser talisa ibaji Dimapur nung ozüng alema arurtem ta temulung melemi bilemertemi inyakba atema JCPI-isa tebilemtsüba abenba metetdaktsü.